Bakı hələlik Paşinyanın bəyanatına cavab verməyib

Bakı/26.09.19/Turan: Ermənistanın baş naziri Nikol Paşinyan Azərbaycanı aqressiya, ermənifobiya və qisas almaq arzusunda ittiham edib. O, bunu sentyabrın 25-də Nyu-Yorkda BMT Baş Assambleyasının 74-cü sessiyasındakı çıxışında deyib.

"Vəzifəyə gəldiyim ilk gündən bəyanatla çıxış edərək bildirdim ki, Dağlıq Qarabağ münaqişəsinin istənlən həlli Ermənistan, Dağlıq Qarabağ və Azərbaycan xalqları üçün məqbul olmalıdır", - o, Azərbaycandan da "analoji" bəyanat gözləntisilə deyib.

Lakin Azərbaycanın ali rəhbərliyi yalnız özünə məqbul həlli istəyir.

"Bu, o deməkdir ki, Azərbaycan hakimiyyəti münaqişəni nizamlamaq niyyətində deyil. Bunun əvəzinə Dağlıq Qarabağ xalqına qalib gəlmək istəyirlər və hər hansı kompromisə getmək istəmirlər", - o deyib.

Azərbaycanın məqsədi 1990-cı və 2016-cı ildə Dağlıq Qarabağ xalqına qarşı uğursuz təcavüz aktlarına görə qisas almaqdır. Bu səbəbdən də onlar antierməni əhval-ruhiyyəsini alovlandırır, silahlara çox böyük vəsait xərcləyirlər və ermənifobiyanı rəsmi siyasətə çeviriblər, Paşinyan deyib.

"Faktiki olaraq qarşı tərəf Dağlıq Qarabağı sovet dövründə olduğu statusa qaytarmaq istəyir. Ancaq bu səylər əbəsdir, çünki SSRİ dövründə Dağlıq Qarabağ Muxtar Vilayətinin xalqı öz müstəqilliyini elan edib və SSRİ-nin tərkibindən çıxaraq özünü təyinetmə hüququnu həyata keçirib. Azərbaycan da belə edib. Və Azərbaycanın bu cür mövqeyi Sovet İttifaqının reanimasiyası ideyasına bərabərdir.

Azərbaycan hökuməti Qarabağ münaqişəsini Ermənistanla Azərbaycan arasındakı ərazi mübahisəsi kimi təqdim edir. Biz münaqişənin bu cür təfsiri ilə tamamilə razı deyilik. Bu, Ermənistanla Azərbaycan arasında mübahisə deyil. Bu mübahisə ərazi iddiaları ilə bağlı deyil. Söhbət insanların, kişilərin və qadınların öz vətənlərində əsrlər boyunca əcdadlarının yaşadıqları həyatı yaşamaq hüququndan gedir. Təəssüf ki, Azərbaycan hakimiyyəti bu adamlarla danışmaq istəmir, çünki onu ancaq ərazilər maraqlandırır, insanlar yox. Daha doğrusu, insanları olmayan ərazilər", - Paşinyan deyib.

Nikol Paşinyan Azərbaycan prezidenti İlham Əliyevi onun təklif etdiyi formulu qəbul etməyə və sülh yolu ilə nizamlanmada irəliləyiş üçün şərait yaratmağa çağırıb.

"Münaqişənin istənilən həlli Ermənistan, Dağlıq Qarabağ və Azərbaycan xalqları üçün məqbul olmalıdır və bütün tərəflər bu formulun reallaşması üçün birlikdə çalışmalıdır", - Paşinyan deyib.

Rəsmi Bakı hələlik Ermənistanın baş nazirinin bu bəyanatına cavab verməyib.-02D-