Bakı Lavrovun Yerevandan gətirdiyi xəbərdən razıdır

RF XİN rəhbəri Sergey Lavrovun Bakıda prezident İlham Əliyev və xarici işlər naziri Elmar Məmmədyarovla danışıqlarının əsas mövzularından biri Qarabağ nizamlanması olub.

 “Lavrovun bölüşdüyü informasiya bizdə müsbət əhval-ruhiyyə yaradır”, - birgə brifinqdə E.Məmmədyarov S.Lavrovun iyulun 4-də Yerevana səfərini şərh edərkən deyib.

O həmçinin qeyd edib ki, Qarabağ nizamlanması Varşavada prezident Əliyevin Fransa başçısı Olland və ABŞ dövlət katibi Kerri ilə görüşlərində də müzakirə edilib.

Bundan əlavə, Sankt-Peterburq görüşündən sonra Putin Fransa və ABŞ prezidentləri ilə Qarabağ nizamlanmasını müzakirə edib.

Ümumilikdə, hazırda Qarabağ münaqişəsinin nizamlanması ilə bağlı ATƏT-in Minsk Qrupunun həmsədrləri ilə intensiv dialoq aparılır. E.Məmmədyarov qalan məsələlərlə bağlı razılığa gəlmək və danışıqlarda dönüşə nail olmaq üçün bu diplomatik fəallığı vacib sayır.

Onun fikrincə, problemin mərhələli həlli üzrə “anlaşma var”. “Hərbi müdaxilə regiona böyük təhlükə yaradır”, - o qeyd edib.

Hər iki nazir indiki danışıqlar prosesinin detallarını açıqlamaqdan imtina edib. E.Məmmədyarovun sözlərinə görə, diplomatik fəallıq və mövzu üzrə, substansiv danışıqların aparılması gələcəyə nikbin baxmağa imkan verir.

S.Lavrov E.Məmmədyarovun nikbinliyini bölüşərək deyib ki, Sankt-Peterburqda üçtərəfli görüşün yekunları üzrə tərəflər “bu vəziyyəti pozmamaq üçün yaranan  ümid cücərtilərinə ehtiyatla yanaşmaq barədə razılığa gəliblər”.

“Belə düşünməyə əsasımız var ki, bu dəfə uğura indiyədək olduğundan daha çox yaxınlaşırıq”, - Lavrov vurğulayıb.

Azərbaycan və Ermənistan liderlərinin növbəti Paris görüşü barədə məlumatlara gəlincə, Məmmədyarov deyib ki, bu görüş Parisdə və ya başqa yerdə ola bilər. Əsas odur ki, danışıqlar mövzu üzrə olsun, “danışıqların əbədi olacağı barədə illüziyalar olmasın”.—06D--