Bakı Təşəbbüs Qrupu siyasi məhbusların ailələrinə dəstəyini açıqlayıb

Bu gün Bakıda Qvadelupa Qurtuluş Xalq Birliyi və Bakı Təşəbbüs Qrupu tərəfindən dəstəklənən ilk Fransa Müstəmləkəçiliyinə dair Konqres öz işinə başlayıb. İki günlük tədbirdə Korsika, Melaneziya, Polineziya, Karib hövzəsi ölkələri və Antil adalarından 15-dən çox siyasi partiya və müstəqillik hərəkatının liderləri iştirak edir. Hollandiyanın Bonayre və Sen-Marten müstəmləkələrindən nümayəndələr tədbirdə fəxri qonaq kimi iştirak edirlər.

Konqresin məqsədi Fransa müstəmləkəçiliyinə qarşı mübarizə üçün strategiyaların əlaqələndirilməsi və vahid platforma yaradılmasıdır. Nümayəndələr səmərəli təcrübələri və öz müqəddəratını təyinetmə strategiyalarını bölüşəcəklər. Müzakirələrin Fransa hökumətinin öz müstəmləkələrində yerli əhaliyə qarşı törətdiyi çox sayda cinayətləri və qanunsuz hərəkətləri üzə çıxaracağı gözlənilir.

2023-cü ilin iyulunda Bakıda Qoşulmama Hərəkatının nazirlər görüşündə təsis edilmiş Bakı Təşəbbüs Qrupu müstəmləkəçiliyə qarşı mübarizə elan edib. Qrup BMT-nin Nyu-York, Cenevrə və Vyanadakı qərargah-mənzillərində əhəmiyyətli tədbirlər də daxil olmaqla, 15-ə yaxın beynəlxalq konfrans təşkil edib.

Qvadelupa Qurtuluş Xalq Birliyinin baş katibi Jan-Yakob Bisep qurultayın keçirilməsinə görə Azərbaycan hökumətinə təşəkkür edib. “Azərbaycan cəsur addımlar atır. Biz ilk dəfə BMT-nin himayəsi altında Bakı Təşəbbüs Qrupunun dəstəyi ilə Bakıda belə bir tədbir keçiririk”, deyə Bisep bildirib. O, müstəmləkəçilik haqqında qlobal məlumatlılığın artırılmasının və Fransaya təzyiq üçün beynəlxalq dəstəyin səfərbər olunmasının vacibliyini qeyd edib.

Yeni Kaledoniyanın xarici işlər naziri Mikael Forrest vahid siyasi strategiya zərurətini vurğulayıb. “Biz platformalarımızı möhkəmləndirməli və müzakirələr aparmalıyıq. Bakı Təşəbbüs Qrupu bizim üçün toplaşmaq və gələcək platformalar haqqında düşünmək imkanı yaradıb. Biz yeni dünya nizamında öz yerimizi tapmalıyıq”, deyə Forrest bildirib.

Yeni Kaledoniya partiyasının üzvü İzabella Kaloy Fransa dövlətinin hərəkətlərini pisləyib, münaqişələrin davam etdiyini  və seçki hüquqlarının pozulduğunu qeyd edib. “Fransa dövlətinin hərəkətləri qəbuledilməzdir və beynəlxalq səviyyədə müzakirə olunmalıdır”, deyə o bildirib. Kaloy konqresin təşkil edilməsinə görə Bakı Təşəbbüs Qrupuna təşəkkür edib və beynəlxalq ictimaiyyəti Fransa ərazilərində insan hüquqlarının pozulmasına diqqət yetirməyə çağırıb.

Yeni Kaledoniya parlamentinin deputatı Mariya Saliqa Fransanın Polineziyada apardığı nüvə sınaqları nəticəsində çəkdikləri çoxillik əziyyətləri xatırladıb. “Fransa terrorçu dövlətdir. O, azad etməkdən imtina etdiyi əraziləri idarə etməkdə davam edir”, deyən Saliqa bu yaxınlarda Yeni Kaledoniyada müstəqillik uğrunda hərəkatların üzvlərinin qanunsuz həbslərini pisləyib.

Bakı Təşəbbüs Qrupunun icraçı direktoru Abbas Abbasov siyasi məhbus ailələrinə dəstək veriləcəyini və Fransa müstəmləkələrindən olan gənclərə Azərbaycanda təhsil üçün təqaüd ayrılacağını açıqlayıb. “Bu ildən etibarən bu bölgələrdən olan gənclər bu təqaüdlərdən faydalana biləcəklər”, deyən Abbasov qrupun müstəmləkəçilik siyasətindən əziyyət çəkənlərə kömək etməyə sadiq olduğunu təsdiq edib.

Sabah konqresin Fransa müstəmləkəçiliyinə qarşı mübarizə və zərər çəkmiş ərazilərin öz müqəddəratını təyin etməsinə yardım üzrə gələcək addımların əksini tapacağı bəyannamənin qəbulu ilə başa çatacağı gözlənilir.