Bakı və Ər-Riyad diplomatik və xidməti pasport sahibləri üçün vizaları ləğv edirlər

Azərbaycan və Səudiyyə Ərəbistanı arasında diplomatik və  xidməti pasportlara malik olan və qısamüddətli səfər edən şəxslərin qarşılıqlı giriş vizasından azad edilməsi haqqında anlaşma memorandumu imzalanıb.

Sənədi sentyabrın 27-də Birləşmiş Millətlər Təşkilatı  Baş Assambleyasının 79-cu sessiyası çərçivəsində görüş zamanı iki ölkənin xarici işlər nazirləri Ceyhun Bayramov və  Feysəl bin Fərhan Əl Səud imzalayıblar.

Azərbaycan Xarici İşlər Nazirliyinin mətbuat xidməti bilsdirib ki, görüşdə bir-birinin legitim maraqlarına qarşılıqlı hörmətə əsaslanan əməkdaşlıqdan razılıqla bəhs olunub.

Tərəflər həmçinin Birləşmiş Millətlər Təşkilatı  və İslam əməkdaşlıq Təşkilatı kimi beynəlxalq təşkilatlar çərçivəsində Azərbaycan və Səudiyyə Ərəbistanı arasında əməkdaşlığın vacibliyini qeyd ediblər. Ceyhun Bayramov Səudiyyə Ərəbistanının Azərbaycanın mövqeyini daim dəstəklədiyinə görə minnətdarlığını bildirib.