Bakı və Tbilisidən ekspertlər sərhədin mübahisəli hissələrinə birgə baxış keçirəcəklər

Bakı/19.08.19/Turan: Avqustun 19-da Gürcüstan və Azərbaycan Respublikasının dövlət sərhədinin delimitasiyası və demarkasiyası üzrə ekspert qrupunun ilk iclası keçirilib.

Azərbaycan Xarici İşlər Nazirliyindən verilən məlumata görə, tərəflər delimitasiya prosesinin gedişatını muzakirə ediblər və razılaşdırılmamış sahələrlə bağlı öz mövqelərini ifadə ediblər. Görüləcək sahə işləri, razılaşdırılmamış sahələrdə birgə ölçmə işlərinin aparılması və həmin yerlərə baxış kecirilməsi planlaşdırılıb.

Gürcüstan tərəfi bu məlumatı təsdiq edib, mübahisəli hissələrə səfərin və "birgə ölçmə işlərinin" avqustun 23-də baş tutacağını qeyd edib.

Xatırladaq ki, əsas fikir ayrılığı Keşikçidağ - David Qareci monastır kompleksi ərazisində sərhədin çəkilməsi ilə bağlıdır. Gürcüstan tərəfi Azərbaycan ərazisinin monastırın iki obyekti yerləşən hissəsinin ona verilməsini istəyir. -16D-