Bakıda Demokratik Qüvvələrin Milli Şurasının mitinqi keçirilib (YENİLƏNİB)

Milli Şuranın mitinqi Azərbaycan Xalq Cəbhəsi Partiyasının sədri Əli Kərimlinin çıxışı ilə başa çatıb. O, bügünkü aksiyanı yeni hərəkatın başlanğıcı kimi qiymətləndirib.

Mitinqdə demokratik spektrə aid müxtəlif siyasi partiyaların təmsilçilərinin çiyin-çiyinə dayandığını qeyd edən Ə.Kərimli deyib ki, onları bir məqsəd- azad Azərbaycan amalı birləşdirir.

“Biz korrupsiyaya, talana, ədalətsiz məhkəməyə, səriştəsiz dövlət idarəçiliyinə yox deyiik”, - o vurğulayıb.

Ə.Kərimlinin sözlərinə görə,  2002-ci ildən bu yana referendum keçirilməsinə üçüncü cəhddir. Məqsəd sülalə hakimiyyətinin davamlı olmasıdır. “Birinci dəfə referendum  hakimiyyətin atadan oğula ötürülməsini təmin etdi, ikinci dəfə müddətsiz prezident seçilməsini”, - o qeyd edib.

Mitinqin qətnaməsi oxunub. Qətnamədə aşağıdakı tələblər irəli sürülüb: antidemokratik referendum ləğv edilsin, siyasi islahatlar aparılsın, məhkəmələrin müstəqilliyi təmin edilsin, ölkənin böhrandan çıxarılması üçün köklü islahatlar aparılsın, manatın devalvasiyasına və qiymət artımına uyğun olaraq əməkhaqqı və pensiyalar artırılsın.

2016 Sentyabr 11 (Bazar) 18:24:30

“Mən burda müsavatçıları, REAL-çıları, NİDA-çıları, digər birliklərin təmsilçilərini görürəm. Bizim dərdimiz azadlıqdir, demokrtaiyadır, daha yaxşı ölkədir. Hökumət bizim aramıza nifaq salmağa çalışdı. Ancaq indi liberallarla millətçilər, dindarlarla ateistlər bu meydanda çiyin-çiyinədir. Çünki bizi birləşdirən fərdi maraqlar yox, azad, demokratik Azərbaycan amalıdır. Biz ki, bu yola addım atmışıq, yolu yarımçıq qoymağa haqqımız yoxdur”, Əli Kərimli vurğulayıb.

AXCP sədri deyib ki, həbsdəki siyasi məhbuslar həmişə yada salınmalıdır: “Bu gün həbsxanalarda 100-dən artıq siyasi məhbus var. Bizim əvvəlki mitinqlərimizin əsas təşkilatçılarından, mənim müavinim Fuad Qəhrəmanlı həbsdədir. Başqa müavinlərim Seymur Həzi, Asif Yusifli həbsdədir. Məmməd İbrahim həbsdədir. Mətanətli İlkin Rüstəmzadə həbsdədir. REAL Hərəkatının rəhbəri İlqar Məmmədov uydurma ittihamlarla həbsdədir, Müsavat başqanının müavini Fərəc Kərimli, ləyaqətli dindarlarımız həbsdədir”, deyən AXCP sədri onların hamısına iştirakçılar adından salam göndərdiyini bildirib.

2016 Sentyabr 11 (Bazar) 18:21:03

NİDA Hərəkatının üzvü Ülvi Həsənli hakimyyətin demokratik gəncliyə qarşı siyasətini kökündən yalnış adlandırıb. “Hakimiyyət gənc fəalları həbs etməklə xilas olacağını düşünür, əslində isə öz sonunu yaxınlaşdırır”.

O, ölkənin xilası naminə repressiyaların  dayandırılmasına, siyasi məhbusların azad edilməsinə, cəmiyyətə təzyiqlərə son qoyulmasına çağırıb.

2016 Sentyabr 11 (Bazar) 18:10:17

“Mən əminəm ki, əgər xalq birləşərsə beç bir despotizm davam gətirə bilməz”, - Milli Şuranın üzvü Gültəkin Hacıyeva bildirib. O qeyd edib ki Azərbaycan xalqı bunu 1918-cı ildə demokratik respublika yaratmaqla sübut edib.

O, Aİ-nin vizasız rejim tətbiq etməkdə olduğu demokratik Gürcüstanla korrupsiya bataqlığında batan Azərbaycanı müqayisə edib.

2016 Sentyabr 11 (Bazar) 18:01:39

Demokratik Qüvvələrin Milli Şurasının üzvü Vidadi Mirkamal mitinqdə vətəndaşları Konstitusiyaya dəyişikliklərlə bağlı referenduma qarşı çıxmağa çağırıb. Bu dəyişikliklər yeddiillik prezident müddətinin tətbiqini, prezidentə parlamenti buraxmaq hüququnun verilməsini, prezidentliyə namizədin yaş həddinin 18-ə endirilməsini və s. nəzərdə tutur. “Bu dəyişikliklər bir ailənin maraqlarına xidmət edir”, - o vurğulayıb.

V.Mirkamal referendumun ləğvinə, keçirildiyi halda isə boykota çağırıb.

“Biz istəyirik ki, xalqı talan etməsinlər. Biz torpaqlarımızın azad edilməsini istəyirik, 25 ildir davam edən saxta danışıqları yox”, - Milli Şuranın digər üzvü Eldəniz Quliyev bildirib.

O, tanınmış ilahiyyatçıların həbsini pisləyib.

2016 Sentyabr 11 (Bazar) 17:37:11

Müşahidəçilər qeyd edirlər ki, indiki mitinq iştirakçıların sayı və etiraz atmosferinə görə Milli Şuranın 2013-cü il mitinqi ilə müqayisə ediləndir.

İlkin məlumatlara görə, mitinqdə 10 mindən çox adam iştirak edir. 

Mitinqdə çoxlu sosial və siyasi şüarlar qaldırılıb: “Gənclik yox deyir!”, “Dikraturaya və monarxiyaya son. Azərbaycana azadlıq!”, “Əməkhaqqı 105 manat, təhsil haqqı 4000 manat!”, “Biz qul deyilik!”, “Azərbaycan monopoliya ölkəsidir!”, “Doğruya dəstək, oğruya lənət!”, “Siyasi məhbuslara azadlıq!” və s.

İndiki mitinqdə çoxsaylı dindar da iştirak edir. Onlar əllərində həbsdə olan “Müsəlman Birliyi” Hərəkatının liderlərinin fotolarını tutublar.

2016 Sentyabr 11 (Bazar) 17:08:54

 Saat 17:00-da Bakıda “Məhsul” stadionunda Demokratik Qüvvələrin Milli Şurasının mitinqi başlayıb.

İkisaatlıq mitinq “Konstitusiyaya dəyişıkliklər haqda referenduma yox!” şüarı ilə keçirilir.

Hakimiyyət mitinqin keçirilməsinə icazə verib.—0--