Bakıda Qoşulmama Hərəkatı Parlament Şəbəkəsinin konfransı keçirilir

Bakı/30.05.22/Turan: Bu gün Heydər Əliyev Mərkəzində Qoşulmama Hərəkatı Parlament Şəbəkəsinin "Dünyada sülhün və dayanıqlı inkişafın təşviqində milli parlamentlərin rolunun gücləndirilməsi" mövzusunda Bakı Konfransı öz işinə başlayıb.

Forumun işində dünyanın 40-dan çox ölkəsindən parlament nümayəndə heyətləri, habelə 9 beynəlxalq parlament təşkilatının nümayəndələri iştirak edir.

Üç günlük konfransda Qoşulmama Hərəkatı Parlament Şəbəkəsinin iş qaydaları, təşkilatın rəsmi loqotipi və bayrağı təsdiq ediləcək, Bakı Bəyannaməsi qəbul ediləcək, sədr və müavinləri seçiləcək.

Konfrans iştirakçıları qarşısında çıxış edən Azərbaycan prezidenti İlham Əliyev Qoşulmama Hərəkatı Parlament Şəbəkəsinin təkcə ölkələrimiz arasında həmrəyliyin möhkəmlənməsinə deyil, həm də parlamentlərarası əlaqələrin inkişafına böyük töhfə verəcəyinə əminliyini bildirib.

"Biz istəyirik ki, səsimiz qlobal səviyyədə eşidilsin. Qoşulmama Hərəkatı Parlament Şəbəkəsi bizim irəli sürdüyümüz yeganə təşəbbüs deyil. Digər təşəbbüsümüz Gənclər Şəbəkəsidir", deyə Əliyev bildirib.

Onun sözlərinə görə, gələn ay Bakıda Qoşulmama Hərəkatı Gənclər Şəbəkəsinin sammiti keçiriləcək.

Bakı Konfransının iştirakçıları Azərbaycanın işğaldan azad edilmiş ərazilərinə, o cümlədən mədəniyyət paytaxtı Şuşa şəhərinə səfər edəcək, burada aparılan quruculuq və abadlıq işləri ilə tanış olacaqlar. 06D