Baş Prokurorluq ermənilərin azərbaycanlı əsgərin cəsədini yandırması faktını araşdırır

Bakı/07.01.21/Turan: Sosial şəbəkələrdə azərbaycanlı hərbçinin cəsədinin erməni əsgərləri və bir mülki şəxs tərəfindən yandırılmasına dair video yayılıb. Fakt üzrə Azərbaycan Cinayət Məcəlləsinin müvafiq maddələri ilə cinayət işi qaldırılıb. Günahkar şəxslərin müəyyən edilməsi və onların məsuliyyətə cəlb edilməsi üçün mümkün tədbirlərin görülməsilə bağlı istintaq tədbirləri aparılır. Bu barədə Azərbaycan Baş Prokurorluğunun 6 yanvar tarixli məlumatında deyilir.

Azərbaycanın hüquq-mühafizə orqanları hərbi cinayətləri törədənlərin milli mənsubiyyətindən asılı olmayaraq, bu cinayət faktlarını araşdırırlar. "Əfsuslar olsun ki, Ermənistan tərəfi Azərbaycan hərbçilərinə və dinc sakinlərə qarşı cinayətləri araşdırmır, günahkarların cəzalandırılması üçün heç bir tədbir görmür. Azərbaycan Baş Prokurorluğu Ermənistanın hüquq-mühafizə orqanlarını beynəlxalq hüququn norma və prinsiplərinə uyğun olaraq ciddi hüquqi tədbirlərin həyata keçirilməsi üçün analoji addımlar atmağa çağırır", - məlumatda bildirilir.-02D-