Bayden Əliyevə: “ABŞ münaqişənin uzunmüddətli nizamlanmasına yardım göstərilməsinə sadiq qalır”

Bakı/24.05.21/Turan: ABŞ prezidenti Cozef Bayden qarşıdan gələn milli bayram - Respublika Günü münasibətilə Azərbaycan prezidenti İlham Əliyevə təbrik göndərib. Bu barədə Azərbaycan prezidentinin rəsmi saytı məlumat yayıb.

Məktubda ABŞ prezidenti qeyd edib ki, 1991-ci ildə Azərbaycanın müstəqilliyinin bərpasının 30 ili tamam olur və bu müddətdə Amerika Birləşmiş Ştatları və Azərbaycan təhlükəsizlik, energetika və demokratik idarəetmə məsələləri üzərində birgə çalışıblar.

"ABŞ ötən il “Cənub” qaz dəhlizinin işə salınması və bu il Türkmənistanla Xəzər yatağının birgə kəşfiyyatı və işlənməsi üzrə imzalanmış anlaşma memorandumu ilə Azərbaycanın Avropanın enerji şaxələndirilməsinə verdiyi töhfəni qətiyyətlə dəstəkləyir.

NATO-nun Əfqanıstandakı missiyasına 20 illik dəstəyinə və terrorizmə qarşı mübarizə səylərinə görə də Azərbaycana minnətdarıq. ABŞ ATƏT-in Minsk Qrupunun həmsədri kimi, əvvəlkitək münaqişənin uzunmüddətli siyasi həllinə dair danışıqlarda yardım göstərməyə sadiqdir", - Bayden təbrikdə qeyd edib.–71D-