Bayden Ukraynaya hərbi yardım üçün lend-liz haqqında qanun imzalayıb

Vaşinqton/10.05.22/Turan: Bazar ertəsi ABŞ prezidenti Co Bayden "Ukraynada demokratiyanın müdafiəsi üçün lend-liz haqqında” qanun imzalayıb. Qanun Ukrayna və Şərqi Avropa ölkələrinə müdafiə vasitələri verməyə imkan yaradır. Bu barədə Turan-ın Vaşinqtondakı müxbiri bildirib.

"Hər günü ukraynalılar öz həyatları ilə ödəyirlər", -Bayden qanunu imzalayarkən deyib. Birləşmiş Ştatlar ukraynalıları "onların öz ölkəsinin və demokratiyanın Putinin qəddar müharibəsindən müdafiəsi uğrunda mübarizəsində dəstəkləyəcək", - o qeyd edib.

Qanun administrasiyanı beş il müddətinə başqa ölkələrə hərbi texnikanın verilməsilə bağlı məhdudiyyətlərdən azad edir, bu barədə Turan-a Pentaqondakı mənbələr bildiriblər.

Lend-liz əvvəllər də, İkinci Dünya Müharibəsi zamanı tətbiq olunub.

O vaxt ümumi məbləği 50,1 milyard dollarlıq mal göndərilmişdi ki, bu da 2020-ci ildə 690 milyard dollara bərabərdir. O zaman Böyük Britaniya 31,4 milyard dollar, Fransa 3,2 milyard dollar, Çin 1,6 milyard dolar, SSRİ 11,3 milyard dollar, digər müttəfiqlər isə 2,6 milyard dollar almışdılar.

Ötən həftə Bayden Ukraynaya daha 150 milyon dollarlıq hərbi yardımın göndərilməsi barədə planlarını açıqlayıb. Bazar ertəsi Ağ Ev həmçinin qanunvericilərə müraciət edərək yaxın aylarda Ukraynanın Rusiyaya qarşı mübarizədə tab gətirməsi, qaçqın böhranını və müharibənin qlobal iqtisadi nəticələrini aradan qaldırması üçün 33 milyard dollar həcmində yardım ayrılmasını istəyib.

Konqresdəki mənbələrə görə, buna cavab olaraq bazar ertəsi axşam Nümayəndələr Palatası bu gün Ukrayna üçün əlavə 40 milyard dollar həcmində əlavə maliyyələşdirməyə baxılacağını təsdiqləyib. 25B