Bayden vida müraciətində Putin, Çin və İrana qarşı mübarizədə öz xidmətlərini qeyd edib

Bazar ertəsi ABŞ prezidenti Co Bayden Dövlət Departamentində vida müraciətində Vladimir Putini Ukraynaya təcavüz etdiyinə görə lağa qoyub. "Putin işğal edəndə Kiyevi bir neçə gün ərzində fəth edəcəyini düşünürdü. Həqiqət budur ki, müharibə başlayandan Kiyevin mərkəzində dayanan tək adam mənəm, o deyil", - Bayden deyib, Turan-ın Vaşinqton müxbiri bildirib.

Getməkdə olan prezident əlavə edib ki, ABŞ və onun müttəfiqləri Ukraynanı "tərk edə bilməzlər". 2022-ci ildə müharibə başlayandan Vaşinqton  milyardlarla dollarlıq hərbi yardım göstərib.  50 ölkədən ibarət koalisiya və NATO üzvlərinin əksəriyyəti öz ümumi daxili məhsulunun 2 faizini müdafiəyə xərcləyirlər. "Bizim alyanslar son onilliklərdə olduğundan daha güclüdür. NATO hər zamankındən daha döyüş qabiliyyətlidir".

Baydenin sözlərinə görə, onun siyasəti dünya səhnəsində Amerikanı son onilliklərdə olduğundan daha güclü və dayanıqlı edib.

"Dörd il əvvəllə müqayisədə Amerika daha güclüdür", - o deyib.  Bundan sonra diplomatlar onu ayaqda alqışlayıblar.

Baydenin iradları onun administrasiyasının Ağ Evə nəzarəti Donald Trampa təhvil verməyə hazırlaşdığı anda səslənib.

Bayden deyib ki, növbəti administrasiya ona ötürülən diplomatik və geosiyasi imkanlardan tam şəkildə istifadə etməlidir: "Çin və Rusiyanın yaratdığı problemləri həll etmək üçün ölkələri birləşdirməyə davam etməlidir”.

"Əmin olun ki, Putinin müharibəsi elə şəkildə bitəcək ki, Ukrayna üçün ədalətli sülh təmin olunacaq" və "yeni vəziyyətdən daha stabil və inteqrasiya olunmuş Yaxın Şərq üçün istifadə ediləcək", - Bayden deyib.

Sonra o qeyd edib ki, İranın hava hücumundan müdafiə sistemi "xarabalıqdadır", iqtisadiyyatı "çıxılmaz vəziyyətdədir və əsas müttəfiqi Hizbullah isə "ciddi yaralıdır". "Bizim hərəkətlərimizin buna mühüm töhfə verdiyinə şübhə yoxdur".

Çinə gəlincə, Bayden qeyd edib ki, "o, bizi heç vaxt üstələməyəcək" və ABŞ-ın dünyanın dominant super gücü olaraq qalacaq. "Son proqnozlara görə, Çin hazırkı kursu ilə də bizi heç vaxt üstələməyəcək", - o deyib.