Baydendən ruslara: "Siz bizim düşmənimiz deyilsiniz"

Vaşinqton/16.02.22/Turan: Çərşənbə axşamı ABŞ prezidenti Co Bayden Ağ Evdən səsləndirdiyi müraciətində bildirib ki, Rusiyanın Ukraynanı işğal etməsi ehtimalı hələ də "böyükdür", amma diplomatik həll də hələ də mümkündür, bu barədə TURAN-ın Vaşinqtondakı müxbiri məlumat verib.

"Biz bütünlükdə Avropada sabitliyi və təhlükəsizliyi yaxşılaşdırmaq üçün Rusiya və müttəfiqlərimiz və tərəfdaşlarımızla diplomatik addımlara hazırıq... Amma biz həm də Rusiyanın Ukraynaya hələ ehtimalı böyük olan hücumuna qətiyyətlə cavab verməyə də hazırıq", deyə Bayden bildirib.

Baydenin nitqi Rusiya Müdafiə Nazirliyinin Ukrayna sərhədindən qoşunların bir hissəsini çəkdiyini bəyan etməsindən bir neçə saat sonra səslənib. Amma Ağ Ev bu elana şübhə ilə yanaşır.

Rusiya gərginliyi davam etdirsə, "biz onun təcavüzünə qarşı mübarizə üçün dünyanı birləşdirəcəyik", Vaşinqton silahlara nəzarət və şəffaflıq məsələlərini Rusiya ilə müzakirə etməyə hazırdır, amma ölkənin ərazi bütövlüyü və öz istiqamətini seçmək hüququ məsələsində güzəştə getməyəcək.

Bayden öz çıxışında öz KİV-lərindən Rusiyanın Ukrayna ətrafında misli görünməmiş qoşun cəmləşdirməsi haqqında çox az məlumat əldə edən sadə ruslara da müraciət edib.

"Siz bizim düşmənimiz deyilsiniz və mən inanmıram ki, siz Ukrayna ilə - dərin ailəvi, tarixi və mədəni bağların sizi birləşdirdiyi ölkə və xalq ilə qanlı, məhvedici müharibə istəyirsiniz", deyə Bayden qeyd edib.

77 il əvvəl xalqlarınız tarixdəki ən dəhşətli müharibəyə son qoymaq üçün çiyin-çiyinə savaşıb, qurbanlar veriblər. "İkinci Dünya Müharibəsi zərurətdən baş verib, amma Rusiya Ukraynaya hücum etsə, bu, seçimə əsaslanan müharibə və ya səbəbsiz müharibə olacaq", deyə Bayden bildirib.

Rusiya yaxın günlərdə və ya həftələrdə Ukraynaya hücum etsə, bu ölkədə insan tələfatı çox böyük olacaq, Rusiya üçün strateji itkilər də çox olacaq. "Dünya Rusiyanın lazımsız ölümü və məhvi seçdiyini unutmayacaq. Ukraynanın işğalı öz-özünə vurulmuş yara olacaq", deyə Bayden əlavə edib. -25В-