Bayramov və Donfrid müharibədən sonra regionda vəziyyəti müzakirə ediblər

Bakı/20.10.21/Turan: Oktyabrın 20-də Azərbaycanın xarici işlər naziri Ceyhun Bayramov və Avropa və Avrasiya məsələləri üzrə dövlət katibinin köməkçisi Karen Donfridin telefon danışığı olub.

Azərbaycan Xarici İşlər Nazirliyinin mətbuat xidmətinin məlumatına görə, Donfrid Bayramovu Azərbaycanın müstəqilliyinin bərpasının 30 illiyi münasibətilə təbrik edib.

Tərəflər iki ölkə arasında əməkdaşlığın gündəliyinə dair fikir mübadiləsi aparıblar və bir sıra istiqamətlər üzrə münasibətlərin inkişaf etdirilməsinin vacibliyini vurğulayıblar.

Telefon danışığı zamanı regionda müharibədən sonrakı vəziyyət müzakirə olunub.

Bayramov Ermənistan-Azərbaycan münasibətlərinin beynəlxalq hüquq prinsipləri əsasında normallaşdırılması ilə bağlı rəsmi Bakının mövqeyini dövlət katibinin köməkçisinin diqqətinə çatdırıb.

Öz növbəsində Donfrid iki ölkə arasında münasibətlərin normallaşmasının vacibliyini vurğulayaraq ABŞ-ın bu prosesə dəstək verməyə hazır olduğunu bildirib.

Tərəflər qarşılıqlı maraq doğuran digər məsələlər ətrafında da fikir mübadiləsi aparıblar, məlumatda bildirilir.—06D-