BDU tələbələrinin etiraz aksiyası

Noyabrın 13-də Bakı Dövlət Universitetinin tələbələri müəllimləri, dosent Altay Göyüşovun işdən çıxarılmasına etiraz olaraq aksiya keçiriblər. 

Noyabrın 12-də A.Göyüşov Facebook səhifəsində yazıb ki, sosial şəbəkələrdə fəallıq göstərməsi ilə əlaqədar işdən çıxarılıb.

Bundan narahat olan tarix fakültəsinin 4-cü kurs tələbələri BDU-nun həyətində toplaşaraq dərslərə girməkdən imtina ediblər. 2-3-cü kursun tələbələrinin bir hissəsi onları dəstəkləyib.

Bundan sonra tarix fakültəsinin dekanı Azad Rzayev və prorektor Sani Hacıyev akt zalında tələbələrlə görüş keçiriblər. Onlar bildiriblər ki, A.Göyüşov işdən çıxarılmayıb, noyabrın 14-dən dərsə gələ bilər.

Bu barədə tələbələr məlumat veriblər.

Onlar xəbərdarlıq ediblər ki, əgər A.Göyüşov işə qaytarılmasa tələbələr dərsə gəlməyəcəklər.

BDU-nun rektoru Abel Məhərrəmov çərşənbə axşamı jurnalistlərə bildirib ki, baxmayaraq ki, A.Göyüşov dərslərə və BDU yanında İslam Araşdırmalar Mərkəzinə işə gəlməyib amma onun işdən çıxarılması haqda əmr yoxdur.

A.Göyüşov noyabrın 13-də gün ərzində mətbuatla əlaqə qurmayıb. Lakin noyabrın 13-də axşam Facebook səhifəsində tələbələrə təşəkkürünü bildirib və onları dərs buraxmamağa çağırıb. 

A.Göyüşov  öz vətəndaş mövqeyi ilə tanınan görkəmli alimdir. Tələbələr arasında hörmətə, nüfuza malikdir. Son vaxtlar başqa qrupların tələbələri də onun mühazirələrinə gəlir. 

Son vaxtlar o, Facebook-da Azərbaycanda keçirilən prezident seçkilərini və BDU-dakı problemləri tənqid  edib.

Bundan əlavə, öz səhifəsində REAL hərəkatının lideri İlqar Məmmədovun həbsi ilə bağlı üzərində ingilis dilində “İlqar Məmmədova azadlıq!” sözləri yazılmış foto yerləşdirib. 

A.Göyüşov “Türk və Qafqaz xalqlarının tarixi” kafedrasında çalışır və Türkiyə tarixi və Qafqazda İslamın tarixi üzrə ixtisaslaşır.06D--