Belarus “Azərbaycan Hava Yolları”nın Nyu-Yorka uçan təyyarəsinin Minsk aeroportundan da sərnişin götürməsini təklif edib

Bakı/14.04.21/Turan: Belarus Azərbaycan Hava Yolları (AZAL) Qapalı Cəmiyyətinin Bakı-Nyu-York-Bakı reysinin Belarusun paytaxtı Minsk vasitəsi ilə yerinə yetirilməsini təklif edib.

Belarusun BelTA agentliyinin məlumatına görə, bu ölkənin nəqliyyat və kommunikasiya naziri Aleksey Avramenko aprelin 13-də Azərbaycanın nəqliyyat, rabitə və yüksək texnologiyalar naziri Rəşad Nəbiyev ilə görüşündə bu təkliflə çıxış edib.

“Hava limanının yaxşı inkişaf etmiş marşrut şəbəkəsi sayəsində Minsk üzərindən ABŞ-a uçuşlar yalnız ölkələrimizin vətəndaşları üçün deyil, Baltikyanı ölkələrdən olan sərnişinlər üçün də cəlbedici ola bilər”, deyə Avramenko qeyd edib.

O, həmçinin Belarus tərəfin bu reysin təşkilində maraqlı olduğunu bildirib və yaxın günlərdə konkret addımlar üzərində işləməyi təklif edib. Azərbaycan tərəfin reaksiyası barədə məlumat verilmir.

Bakı-Nyu-York reysi məhz ara enişlər olmadan, birbaşa uçuş olduğu üçün cəlbedicidir. Digər tərəfdən, qonşu ölkələrin sərnişinləri sərfəli qiymətlərlə əlaqədar bu tranzitdən istifadə edirlər.

Uçuş Minsk üzərindən həyata keçirilərsə bu sərnişinlər iki dəfə təyyarəyə minib-enməli olacaqlar ki, bu da səyahət müddətini xeyli uzadacaq. -03-