Bələdiyyə seçkiləri seçki təcrübəsində irəliləyiş olmadığını göstərdi, ekspert

Bakı/24.12.19/Turan: Hazırki bələdiyyə seçkiləri də əvvəlki seçkilər kimi çoxsaylı qanun pozuntuları ilə müşaiyət olunub. Bu fikri "Amerikanın Səsi"nə müsahibəsində "Vətəndaş Hüquqları İnstitutu" QHT-nin rəhbəri Bəşir Süleymanlı bildirib.

Onun sözlərinə görə, seçkilər nəinki beynəlxalq standartlara, heç yerli qanunvericiliyə də uyğun olmayıb.

Əvvəllər də olduğu kimi, ən çox yayılmış pozuntu növləri "karusellər", bülletenlərin atılması, müşahidəçilərə təzyiqlər olub.

Saxtalaşdırma texnologiyalarında "yenilik" isə "karusellərə" orta məktəb şagirdlərinin valideynlərinin kütləvi şəkildə cəlb edilməsi olub.

Belə ki, müəllimlər valideynləri harada qeydiyyatda olduqlarından asılı olmayaraq seçki məntəqələrinə çağırıblar.

Seçkilər başa çatdıqdan sonra protokollar nəticələrin saxtalaşdırılması məqsədilə təhrif edilib.

Süleymanlı qeyd edib ki, seçki təcrübəsində irəliləyiş olmaması fevralın 9-da keçiriləcək parlament seçkiləri ilə bağlı nikbinlik yaratmır.

Bələdiyyə seçkilərinin nəticələrinin saxtalaşdırılması vətəndaşlarda məyusluq doğura bilər və partiyaların, fəalların və sıravi vətəndaşların parlament seçkilərində iştirak etmək arzusunu əlindən ala bilər.

Süleymanlının fikrincə, bələdiyyə seçkilərində yol verilmiş saxtakalaşdırmalar araşdırılarsa, pozuntuların olduğu məntəqə və dairələrdə nəticələr ləğv edilərsə, vətəndaşların seçkilərə etimadını bərpa etmək olar. –16D06-