Bəxtiyar Hacıyevin işi üzrə prosesdə

Cümə günü Bakı Ağır Cinayətlər Məhkəməsində ictimai fəal Bəxtiyar Hacıyevin işi üzrə proses davam edib.

Məhkəmə Yasamal Rayon məhkəmə iclasının katibi Emin Əlizadə iki il əvvəl Hacıyev və zərərçəkmiş Ülviyyə Muradova (Alovlu) arasında münaqişə haqqında ifadəsini dinləyib.

O bildirib ki, Hacıyev və Muradova qarşılıqlı olaraq bir-birini təhqir edirdilər və Hacıyev “bir neçə dəfə” ona vurub.

Cavab olaraq Hacıyev şahiddən niyə Yasamal rayon polis idarəsində təhqiqat zamanı bunu demədiyini, bir il sonra Bakı şəhər Baş Polis İdarəsində danışdığını soruşub.

Hacıyev bu şahidin ifadələrinin məhkəmənin digər əməkdaşı, zərərçəkmiş kimi tanınmış Orxan Abdullayevin ifadələri ilə eyni olmasına diqqət çəkib.

Hacıyevin sözlərinə görə, bu iki şəxsin ifadələrinin 80%-i üst-üstə düşür. O, şahidi yalan danışmaqda ittiham edib.

Daha sonra mülki iddiaçı - Vergilər Nazirliyinin nümayəndəsi çıxış edib, o, Hacıyevin sadələşdirilmiş sistem üzrə vergiləri və subicarə üçün 52 min manatlıq vəsaiti ödəmədiyini bildirib. O qeyd edib ki, maliyyə sənədləri olmadığına görə vergilər bənzər şirkətin fəaliyyəti əsasında hesablanıb.

Lakin Hacıyev bütün sənədləri təqdim etməyə hazır olduğunu bildirib və vergilərin yenidən hesablanmasını tələb edib.

Hakim bu suala nümayəndənin təmsil etdiyi vergilər departamentinin rəhbərliyinin cavab verə biləcəyini deyib.

Daha sonra Hacıyev qeyd edib ki, prosesdə hələ 15 şahid dinlənilməyib. O, məhkəmə prosesini sürətləndirmək üçün onların ibtidai istintaq zamanı verdikləri ifadələri oxumağı təklif edib.

Bununla əlaqədar olaraq hakim bildirib ki, şahidlərə bir daha çağırış göndəriləcək və onlar gəlməsə, dövlət ittihamçısının razılığı ilə şahidlərin hazırlıq iclasında verdikləri ifadələrin oxunması barədə qərar qəbul edilə bilər.

Növbəti məhkəmə iclası iyulun 26-na təyin edilib.

* Hacıyev 9 dekabr 2022-ci il tarixində jurnalist Ülviyyə Alovlunun şikayəti əsasında saxlanılıb. O, əvvəlcə CM-in 221-ci (“xuliqanlıq”) və 289-cu (“məhkəməyə qarşı hörmətsizlik”) maddələri ilə ittiham olunub.

2023-cü ilin iyulunda ona qarşı CM-in 192-ci (“qanunsuz sahibkarlıq”), 193-1 (“cinayət yolu ilə əldə olunmuş gəlirlərin leqallaşdırılması”) və 206-cı (qaçaqmalçılıq) maddələri ilə ittihamlar irəli sürülüb.

7 noyabr 2023-cü il tarixində CM-in 213.1-ci (vergiləri, işsizlikdən sığorta, icbari tibbi sığorta və ya məcburi dövlət sosial sığorta haqlarını ödəməkdən yayınma) maddəsi ilə ittiham irəli sürülüb.

Hacıyev bütün ittihamları rədd edir və hakimiyyəti tənqid etdiyinə, repressiyalarda əli olan azərbaycanlı məmurlara və güc qurumlarına qarşı beynəlxalq sanksiyalar tətbiq etmək çağırışlarına  görə təqib olunduğunu bildirir.