Bəxtiyar Hacıyevin işi üzrə prosesdə

Dekabrın 2-də Bakı Ağır Cinayətlər Məhkəməsində hakim Əli Məmmədovun sədrliyi ilə insan hüquqları fəalı Bəxtiyar Hacıyevin işi üzrə proses davam etdirilib.

Bu gün məhkəmə iş üzrə səndələri elan edib və vəkillərin vəsatətlərini dinləyib.

Hakim qeyd edib ki, növbəti iclasda müdafiə tərəfinin vəsatətlərini müzakirə edəcək.

"Müdafiə tərəfi saxta səndələrin iş materiallarından çıxarılması, yalan ifadə vermis şahidlərin cinayət məsuliyyətinə cəlb edilməsi, əlavə sübutların tələb olunması ilə bağlı vəsatətlər verdi. Bəxtiyar Hacıyev də eyni məzmunda çıxış etdi. O bildirdi ki, iş materiallarına mənbəyi məlum olmayan sənədlər əlavə edilib. Onun əsasında Hacıyevə qarşı əlavə ittihamlar irəli sürülüb. Həmin sənədlərin haradan, necə əldə edildiyi barədə iş materiallarında hər hansı sübut yoxdur. Qanunvericliyə görə sübutların mənbəyi məlum olmalıdır və mənbəyin mötəbərliyinə görə sübutlar qiymətləndirilməlidir. Bununla bağlı iş materiallarına daxil edilmiş e-mailin necə əldə olunduğunun, Daxili İşlər Nazirliyinə necə göndərildiyinin araşdırlmasını tələb etdi. O, həmçinin dedi ki, bu email Bakı şəhər Baş Polis İdarəsində açılıb və həmin emaildən özlərinə mesaj göndəriblər. Ona görə Hacıyev Daxili İşlər Nazirliyinə daxil olmuş e-mailə baxış keçirilməsini, o e-mailin nə vaxt və kim tərəfindən göndərildiyinin araşdırılmasını tələb etdi", deyə vəkil Elçin Sadıqov bildirib.  

Növbəti məhkəmə iclası dekabrın 9-na təyin edilib.  

* Bəxtiyar Hacıyev 2022-ci ilin dekabrında xuliqanlıq və məhkəməyə qarşı hörmətsizlik ittihamı ilə həbs olunub.

Ötən il iyunun 16-da fəala qarşı yeni ittihamlar irəli sürülüb. Bu ittihamlar əsasən maliyyə məsələlərilə - ayrılan qrantların təyinatı üzrə xərclənməməsilə bağlıdır.

Elə həmin ilin noyabrında ona qarşı daha bir ittiham - vergidən yayınma ittihamı irəli sürülüb.

Bəxtiyar Hacıyev bu ittihamların heç birini qəbul etmir. Fəal özünü təqsirli bilmir, sifarişlə həbs olunduğunu, daxili işlər naziri Vilayət Eyvazovun ünvanına səsləndirdiyi tənqidlərə görə cəzalandırıldığını deyir.