Beynəlxalq təşkilatlar Leyla və Arif Yunusların azadlığa buraxılmasını tələb edirlər

  Azərbaycan hakimiyyəti ölkədə müstəqil vətəndaş cəmiyyətinə təzyiq göstərmək üçün mümkün olan hər şeyi edir. Bu barədə Human Rights House Foundation (İnsan Hüquqları Evi Fondu) təşkilatının nümayəndəsi Ane Tusvik Bunde Leyla və Arif Yunusun barəsində ittiham hökmünü şərh edərkən bildirib.

O, beynəlxalq birliyi Azərbaycanda həbs olunan hüquq müdafiəçilərinə, “repressiya mühitində” fəaliyyət göstərən həmkarlarına və qohumlarına dəstək olmağa çağırıb.

“Bütün siyasi liderlər və institutlar vətəndaş cəmiyyətinin liderlərinin dərhal və şərtsiz azad edilməsinə çağırmalıdır”, - Bunde qeyd edib.

Öz növbəsində Human Rights Watch təşkilatının nümayəndəsi, hökmün çıxarılması zamanı prosesdə iştirak edən  Tatyana Lokşina bildirib ki, Arif və Leyla Yunusların səhhəti bu cəzanı çəkməyə imkan vermir. Bu cəza onlar üçün ölüm hökmü deməkdir”.

Freedom Now hüquq-müdafiə təşkilatı da Yunulsarın azad edilməsinə çağırıb. Qurumun icraçı direktoru Maran Turner hökmü “sarsıdıcı və biabırçı” adlandırıb.

“Leyla və Arif Yunuslar öz həyatlarının böyük hissəsini insan hüquqlarının müdafiəsinə, Ermənistanla Azərbaycan arasında münaqişənin həllinə həsr ediblər. Onların səhhətini nəzərə alsaq çıxarılan hökm ölüm hökmünə bərabərdir”, - Turner vurğulayıb.—16D-