Birləşmiş Millətlər Təşkilatı Rusiyanın qanunsuz referendumlarını və Ukraynanın anneksiyasını rədd edir

Vaşinqton/13.10.22/Turan: Çərşənbə günü Birləşmiş Millətlər Təşkilatı Baş Assambleyası Ukrayna ərazilərini anneksiya etmək cəhdinə görə Rusiyanı pisləyən qətnamə qəbul edib.  Qətnamənin lehinə 143 ölkə səs verib, 5 ölkə əleyhinə olub, 35 ölkə bitərəf qalıb, 10 ölkə, o cümlədən Azərbaycan səsvermədə iştirak etməyib. Bu barədə Turan-ın Vaşinqtondakı müxbiri bildirib.

Prezident Co Bayden səsverməni alqışlayaraq qeyd edib ki, 143 ölkə azadlıq, suverenlik və ərazi bütövlüyünə tərəfdar olub. Bunlar ən çox Rusiyanın Ukraynaya qarşı təcavüzünü qeyd-şərtsiz pisləyən ölkələrdir (141).

Cəmi 4 ölkə Rusiyanın tərəfini tutub - Belarus, Koreya Xalq Demokratik Respublikası, Nikaraqua və Suriya.

“Rusiya Birləşmiş Millətlər Təşkilatı Nizamnaməsinin əsas müddəalarına zərbə vurmaqla beynəlxalq sülh və təhlükəsizliyin əsaslarını pozur. Dünya dəqiq siqnal verdi: Rusiya suveren ölkəni dünya xəritəsindən silə bilməz”, - Bayden bildirib.

“Biz Birləşmiş Millətlər Təşkilatı Baş Assambleyası ilə birlikdə qonşu torpaqların qanunsuz anneksiya və ya zorla oğurlanması cəhdlərinə dözməyəcəyik. Biz beynəlxalq hüququ, Birləşmiş Millətlər Təşkilatının Nizamnaməsini, Ukraynanın və onun xalqının və hər yerdə hər bir dövlətin və xalqın hüquqlarını müdafiə edəcəyik”, - Bayden vurğulayıb.

Öz növbəsində dövlət katibi Entoni Blinken səsverməni “xalqların böyük əksəriyyətinin Ukraynanı dəstəkləməsinə dair güclü xatırlatma” adlandırıb.

 “Ərazi bütövlüyü Birləşmiş Millətlər Təşkilatının mərkəzi dayağıdır və Rusiyanın Ukraynanın milli sərhədlərinə və suverenliyinə qarşı qəzəbli hörmətsizliyi “qəbul edilə bilməz və qəbul edilməyəcək”, - Blinkenin bəyanatında deyilir. 25B