BMT xüsusi məruzəçiləri Bakını X.İsmayılovanın ölkədən çıxışına qoyulmuş qadağanı ləğv etməyə çağırıblar

Bakı/05.12.17/Turan: Azərbaycan hakimiyyəti araşırmaçı jurnalist Xədicə İsmayılovanın xaricə səfərlərinə qoyulmuş qadağanı ləğv etməli və ölkədə media azadlığını gücləndirməlidir. Bu barədə BMT-nin ifadə azadlığı üzrə xüsusi məruzəçisi Devid Kaye (David Kaye) və hüquq müdafiəçilərinin vəziyyəti üzrə xüsusi məruzəçisi Mişel Forstun (Michel Forst) dekabrın 5-də yayımlanmış birgə bəyanatında deyilir.

Bəyanatda bildirilir ki, İsmayılova bir sıra beynəlxalq mükafatlara layiq görülüb, amma mükafatlandırma mərasimlərində iştirak edə bilməyib. Bu qadağa jurnalistin ifadə azadlığını pozur və bunun məqsədi jurnalistin xaricdə insan hüquqları haqqında danışmasına mane olmaqdan ibarətdir. İsmayılova qadağanın ləğv edilməsi üçün dəfələrlə məhkəmələrə müraciət edib, amma bu müraciətlər nəticə verməyib.

"Hakimiyyətin xanım İsmayılovaya qarşı hərəkətləri hüquq çərçivəsini aşır. Bu, onun işinə və ölkədə müstəqil jurnalistikaya zərbə vurur", deyə bəyanatda qeyd edilir.

İsmayılova 2014-cü ilin dekabrında həbs edilib, 2015-ci ilin sentyabrında isə o, iqtisadi ittihamlarla 7,5 il müddətinə azadlıqdan məhrum edilib. İsmayılova ittihamları təkzib edib, beynəlxalq təşkilatlar isə onu siyasi məhbus kimi tanıyıblar.

Beynəlxalq ictimaiyyətin təzyiqi altında 2016-cı ilin mayında AliMəhkəmə real azadlıqdan məhrumetmə müddətini beş il sınaq müddəti olmaqla, 3.5 il şərti cəza ilə əvəz edib. Bundan sonra o, peşə fəaliyyəti ilə əlaqədar ölkədən çıxmaq üçün dəfələrlə məhkəmələrə müraciət edib, amma imtina cavabı alıb. -06B-