BOK fransalı şərhçinin ifadələrinə görə Azərbaycandan üzr istəyib

Beynəlxalq Olimpiada Komitəsi (BOK) Parisdə keçirilən Yay Olimpiya Oyunlarının açılış mərasimində Fransanın aparıcı "France2" telekanalının müxbirinin ifadələrə görə Azərbaycandan üzr istəyib.

Bu barədə BOK-un Azərbaycan Gənclər və İdman Nazirliyi və Milli Olimpiya Komitəsinin etiraz məktubuna verdiyi rəsmi cavabda deyilir.

Xatırladaq ki, iyulun 26-da Parisdə Yay Olimpiya Oyunlarının açılış mərasimində Fransanın “France 2” telekanalının müxbiri Azərbaycana qarşı ayrı-seçkilik xarakterli ifadələr işlədib.

O cümlədən, Ermənistanı Fransanın dostu adlandırıb və əlavə edib ki, “bu il erməni xalqı üçün Dağlıq Qarabağın Azərbaycan ordusu tərəfindən süqutu kimi yadda qalıb”.

“Bu, Olimpiya Xartiyasının əsas prinsiplərinin faktiki şəkildə pozulmasıdır. Xartiyada aydın şəkildə qeyd olunur ki, “BOK-un missiyası bütün dünyada olimpizmi təbliğ etmək, Olimpiya Hərəkatına rəhbərlik etmək, idmanın və idmançıların hər hansı siyasi və ya kommersiya istismarına qarşı çıxmaqdır”, - Azərbaycan tərəfinin etirazında bildirilir.

Cavab məktubunda BOK bu cür bəyanatların BOK-un prinsip və dəyərlərinə zidd olduğunu qeyd edərək Azərbaycandan üzr istəyib.

Məktubda həmçinin qeyd olunur ki, gələcəkdə oxşar halların yaşanmaması üçün məsələ məsul qurumlar və şəxslərlə müzakirə edilib.