Böyük Britaniya səfiri Suraxanıda zibil yıgdı

Bakı/12.05.21/Turan:  “Mənim gözəlləşən kəndim” adlı ekoloji aksiya  Böyük Britaniya Birləşmiş Krallığının Azərbaycandakı səfiri cənab Ceyms Şarp iştirakı ilə  keçirildi. Bu xəbəri YUVA təşkilatı verib.

Təşəbbüs Suraxanı rayonu bir qrup gənci tərəfindən Böyük Britaniyanın Azərbaycandakı səfirliyinin və YUVA Humanitar Mərkəzinin dəstəyi ilə həyata keçirilən "Danışın, Qızlar" adlı layihənin bir hissəsidir. Layihənin əsas məqsədi gənc qadın və qızların səlahiyətlərin genişləndirilməsi və cəmiyyətdə gender və qadın hüquqları ilə bağlı ictimai qavrayış və anlayışın dəyişməsidir.

Suraxanı rayon İcra Hakimiyyətinin nümayəndələri, eləcə də Böyük Britaniya Birləşmiş Krallığının Azərbaycandakı səfiri cənab Ceyms Şarp və səfirliyin əməkdaşları aksiya iştirakçılarına dəstək olmaq üçün gəldilər və ərazilərin təmizlənməsində fəal iştirak etdilər.

“Qız və qadınların səlahiyyətləndirilməsi və gücləndirilməsi, potensiallarının reallaşdırılması, cəmiyyətimiz üçün aktual bir məsələdir. Onların sosial və peşə inkişafı üçün əlverişli şərait yaratmalıyıq və onları ictimai əhəmiyyətli sosial problemlərin həllinə yönəltməliyik”, - Pərvanə Məmmədova, “YUVA” Humanitar Mərkəzinin sədri dedi.

Aksiya nəticəsində təqribən bir hektar ərazi zibildən təmizləndi və 20 torbadan çox tullantı toplanıldı.

“YUVA” Humanitar Mərkəzi 1997-ci ildə yaradılan qeyri-hökumət, qeyri-kommersiya təşkilatıdır. Təşkilatın məqsədi Azərbaycanda vətəndaş cəmiyyətinin qurulmasında qadınların, uşaqların və gənclərin özünü həyata keçirməsinə töhfə verməkdir. -0-