Ermənistan Silahlı Qüvvələrinin keçmiş zabitinə Azərbaycanın xeyrinə casusluq ittihamı irəli sürülüb

Bakı/12.05.21/Turan: Ermənistanın Milli Təhlükəsizlik Xidməti Azərbaycanın xeyrinə casusluqda ittiham olunan keçmiş hərbi qulluqçunun işi üzrə istintaqı yekunlaşdırıb.

Ermənistan Silahlı Qüvvələrinin adı açıqlanmayan zabiti əvvəllər yüksək vəzifələr tutub və məxfi sənədlərə çıxışı olub. O, ödəniş müqabilində Azərbaycan tərəfə məlumat ötürürdü, bu barədə Ermənistanın Milli Təhlükəsizlik Xidməti məlumat yayıb.

Mənbənin məlumatına görə, zabit Gürcüstanda əməkdaşlığa cəlb edilib, burada ona məlumat yığmaq tapşırıqları verilib.

Zabitin maliyyə problemləri var idi və o, bu problemləri məxfi məlumatları satmaqla həll etmək istəyirdi. O, Ermənistan və Qarabağ Silahlı Qüvvələrinin birləşmələrinin şəxsi heyəti, yerləşmə yeri, silah və texnikası haqqında məlumatları yığırdı. O, bütün sənədləri evdə saxlayırdı.

O, ordudakı və Qarabağdakı tanışlıqlarından istifadə edərək, müntəzəm olaraq hərbiçilərlə görüşür və məlumat yığırdı, daha sonra bu məlumatları Gürcüstanda Azərbaycan tərəfə verirdi. Bəzi görüşlər Azərbaycanın Tbilisidəki səfirliyinin ərazisində keçirilirdi.

Keçmiş hərbiçiyə qarşı 299-cu maddənin 1-ci hissəsi ilə ittiham irəli sürülüb, o həbs edilib. -02D-