"Bu mübarizədə qəhrəman yoxdur": Dövlət Departamentinin Putin və Priqojin haqqında şərhi

Vaşinqton/11.07.23/Turan: Bazar ertəsi Dövlət Departamenti Rusiya prezidenti Vladimir Putinin ötən ay "Vaqner"in baş tutmayan qiyamından sonra bu hərbi qruplaşmanın başçısı Yevgeni Priqojinlə görüşdüyü haqqında məlumatlara münasibət bildirib.

"O ikisi arasındakı mübarizədə qəhrəman yoxdur", deyə mətbuat katibi Metyu Miller gündəlik brifinqdə Turan-ın suallarına cavabda bildirib. "Bu, Ukraynada vəhşiliklər törədən və ya bu vəhşiliklərin törədilməsi haqqında əmr verən iki şəxsdir", deyə o əlavə edib.

Kremlin mətbuat katibi Dmitri Peskovun sözlərinə görə, Putin və Priqojinin görüşü iyunun 29-da baş tutub və 3 saata yaxın davam edib.

Peskov deyib ki, daha sonra "Vaqner"in komandirlərinə "əlavə iş və gələcək döyüş tətbiqi variantları" təklif olunub, hərbi birləşmələrin Rusiya uğrunda "mübarizəni davam etdirməyə hazır olduqları" əlavə olunub. 

Dövlət Departamentinin nümayəndəsi Millerin sözlərinə görə, Priqojinlə bağlı epizodun necə inkişaf edəcəyini "hələ aydınlaşdırmaq lazımdır".

"Bu hadisələrin yeni inkişafı idi və mən yeni hadisələrin davam edəcəyini təxmin edirəm", deyə o əlavə edib.