Bundestaq deputata Bakıdan pul aldigina görə töhmət verib

Bakı/19.01.19/Turan: Bundestaq Xristian-Demokrat İttifaqından olan deputat Karin Ştrensə deputatlıq normalarının pozulması ilə əlaqədar töhmət verib, xəbəri DW yayıb.

Bu yaxınlara qədər AFR kansleri Angela Merkelin rəhbərlik etdiyi partiyanın nümayəndəsi müəyyən edilmiş müddət ərzində əlavə gəlirləri haqqında məlumat verməyib, bu barədə Bundestaq administrasiyası yanvarın 18-də bildirib.

Deputat barəsində cərimə proseduru davam edir, deyə rəsmi bəyanatda bildirilir.

Der Tagesspiegel qəzetinin məlumatına görə, söhbət Ştrensin Azərbaycandakı alman firmasından aldığı vəsaitdən gedir. Töhmətlə yanaşı, deputat 10 min avrodan 99 min avroya qədər cərimə oluna bilər, deyə nəşr qeyd edir.

Bu arada, Bundestaqda Ştrensin deputat mandatından məhrum edilməsi haqqında tələblər səslənir. Xüsusən, sosial-demokrat Frank Şvane (Frank Schwabe) bildirib ki, o, "siyasi rəhbərliyin nüfuzuna ciddi ziyan vurub".

Karin Ştrenslə bağlı şübhələr hələ 2017-ci ildə Avropa Şurasının Parlament Assambleyasında (AŞPA) korrupsiya qalmaqalı zamanı yaranıb. Xüsusən, müstəqil ekspertlər qrupunun 2018-ci ilin aprelində dərc edilmiş Avropada Bakının maraqlarının lobbiçiliyinə görə rüşvət alınması haqqında məruzəsində onun adı çəkilir. Sənəddə iddia olunur ki, korrupsiya qalmaqalının əsas fiqurantı, sabiq deputat Eduard Lintner (Eduard Lintner) onu özünə məxsus, Bakıdan maliyyələşən və Azərbaycanın maraqlarının lobbiçiliyi ilə məşğul olan Line M-Trade konsaltinq şirkəti vasitəsilə işə qəbul edib.

Daha sonra Ştrens bildirib ki, şirkətin maliyyələşmə mənbəyi haqqında məlumatı olmayıb. Şübhələrə əlaqədar 2018-ci ilin əvvəllərində onu AŞPA-da Bundestaqın nümayəndə heyətindən çıxarıblar, deyə DW qeyd edib. -0-