Casusluqda ittiham olunan fransızın məhkəməsi başlayıb

Yanvarın 6-da Bakı Ağır Cinayətlər Məhkəməsində casusluqda ittiham olunan Fransa vətəndaşı Martin Rayanın məhkəməsi başlayıb. Prosesə Elmin Rüstəmov sədrlik edib.

Məhkəmə qarşısına "dövlətə xəyanət"də ittiham olunan Azərbaycan vətəndaşı Azad Məmmədli də çıxıb.

İclasın əvvəlində hakim elan edib ki, Cinayət Məcəlləsinin 276-cı maddəsilə (casusluq) Rayanı  10 ildən 15 ilədək azadlıqdan məhrum olunma cəzası, 274-cü maddə (dövlətə xəyanət) ilə ittiham olunan Məmmədlini isə 15 ildən ömürlük həbsə qədər cəza gözləyir.

Prokuror Ziya Mansurov ittiham aktını açıqlayıb. Akta əsasən Rayan 2021-ci ildə Fransanın Bakıdakı səfirliyində çalışmış Fransa Müdafiə Nazirliyi Xarici Təhlükəsizlik Baş İdarəsinin işçiləri tərəfindən əməkdaşlığa cəlb edilib.

Rayana Fransada təhsil almış və fransız dilini bilən Azərbaycan vətəndaşları (onları əməkdaşlığa cəlb etmək üçün)  haqqında məlumat toplamaq tapşırılıb.

Bundan əlavə, Rayana Azərbaycanın Böyük Britaniya ilə əməkdaşlığı, Türkiyə ilə hərbi əlaqələr, Pakistan və digər ölkələrdən hərbi təchizat, İran, Rusiya şirkətlərinin Azərbaycandakı fəaliyyəti, Azərbaycanın Avropa İttifaqı ölkələri ilə əlaqələri barədə məlumat toplamaq tapşırılıb.

Azərbaycan vətəndaşı azad Məmmədlinin Fransa xüsusi xidmət orqanlarının əməkdaşları ilə görüşünün təşkili Rayana həvalə edilib. Əməkdaşlıq müqabilində Məmmədliyə Avropa ölkələrindən birində yaşamaq üçün şərait yaradılacağı vəd edilib.

Məmmədliyə sözügedən xarakterli məlumatların toplanması da tapşırılıb. Bundan əlavə, ondan tələb olunub ki, Fransanın Azərbaycan və Ermənistan arasında sülhün tərəfdarı, Rusiyanın isə münaqişənin davam etdirilməsinin tərəfdarı olması barədə təbliğat aparsın.

Məmmədli özünü təqsirli bilməyib. Ryan bildirib ki, özünü qismən günahkar sayır. O deyib ki, qeyd olunan hərəkətləri  şüurlu şəkildə və qəsdən törətməyib və məhkəmə zamanı bunu sübut etməyə hazırdır. Növbəti məhkəmə iclası fevralın 19-na təyin edilib.

Xatırladaq ki, Martin Rayan 4 dekabr 2023-cü ildə saxlanılıb və Fransa kəşfiyyatının xeyrinə casusluqda şübhəli bilinərək həbs edilib.

O 2020-ci ilin oktyabrndan Bakıda fəaliyyət göstərən və qida məhsulları və xammal idxalı üzrə  ixtisaslaşan “Merkorama” şirkətinə rəhbərlik edib. Şirkət həmçinin Azərbaycanda xarici şirkətlərin ixrac məsələləri və müəssisələrin yaradılması, İT, mühasibatlıq, hüquqi məsələlər və tərcümə sahəsində xidmətlərin göstərilməsi üzrə konsaltinqi ilə məşğul olub.