Çavuşoğlu Ermənistanı gələcək təxribatlardan çəkindirib

Bakı/08.08.22/Turan: Türkiyə Ermənistana növbəti təxribatların yolverilməzliyi barədə xəbərdarlıq edir, ölkənin xarici işlər naziri Mövlud Çavuşoğlu bildirib.

“Türkiyə haqqın tərəfində olub və qalır, ədalətin tərəfindədir. Qarabağ məsələsində belə oldu. Biz onilliklərdir ki, Azərbaycan torpaqlarının işğalının yolverilməz olduğunu bəyan edirik”, - bazar ertəsi Çavuşoğlu Ankarada Türkiyə səfirlərinin 13-cü konfransının açılışında deyib, “Anadolu” agentliyi bildirib.

Onun sözlərinə görə, 44 günlük müharibədən sonrakı dövrdə Ankara Cənubi Qafqazda sülhün və sabitliyin təmin edilməsi, əməkdaşlıq mühitinin formalaşdırılması üzrə səylərini davam etdirir.

“Biz Ermənistana növbəti təxribatların yolverilməzliyi barədə bir daha xəbərdarlıq edirik”, - türkiyəli nazir deyib.

“Ölkəmiz heç bir ölkə üçün düşmən deyil. Bunun əksini iddia edən hər kəs qərəzlidir”, - nazir vurğulayıb. 1606D