Cənubi Qafqaz media konfransı

Bakı/20.11.20/Turan: : “Media azadlığı və cəmiyyətin sabitliyi üçün məlumat əldə etmək: problemlər və perspektivlər" adlı 17-ci illik Cənubi Qafqaz media konfransı keçirilib. Tədbiri ATƏT-in KİV azadlığı üzrə nümayəndəsinin bürosu təşkil edib.

İki gün davam edən konfrans COVID-19 pandemiyası səbəbindən online keçirilib.

Forum iki hissədən ibarət olub. Birinci plenar iclasda COVID-19 pandemiyası dövründə  medianın azadlığı və informasiyaya əlçatımlılıq müzakirə olunub.  İkinci plenar iclas isə son bir ildə bölgədə ifadə azadlığı və media azadlığının vəziyyətinə həsr olunub.

Konfransda Azərbaycan,  Gürcüstan və Ermənistandan olan  media ekspertləri, hüquq müdafiəçiləri, beynəlxalq ekspertlər  iştirak ediblər.

Üç ölkənin nümayəndələri  pandemiya dövründə jurnalistlərin qarşılaşdığı problem və təzyiqlərdən danışıblar. Onlar  rəsmi qurumların nümayəndələrinə təkliflər irəli sürüblər. --16D-