Delyaginin sözləri Azərbaycan-Rusiya münasibətlərinə xələl gətirir - səfir Boçarnikov

Bakı/30.03.22/Turan: RF-nin Azərbaycandakı səfiri Mixail Boçarnikov çərşənbə günü hökumətyönlü KİV-lər üçün brifinq keçirərək, bir sıra mühüm bəyanatlar verib.

Xüsusən, o, KİV-lərin Rusiya sülhməramlılarının Qarabağdan Ukraynaya göndərilməsi haqqında məlumatını təkzib edib. Bu zaman o, Fərrux yüksəkliyi ətrafında son gərginlik və RF və Azərbaycan müdafiə nazirliklərinin qarşılıqlı ittihamları ilə bağlı şərh verməyib.

Azərbaycanı bombalamağa çağıran Dövlət Dumasının deputatı Mixail Delyaginin qalmaqal yaradan bəyanatını şərh edən səfir deyib ki, bu bəyanat Moskvanın rəsmi mövqeyini əks etdirmir və Kreml və RF XİN tərəfindən artıq tənqid edilib.

"Hesab edirəm ki, bu cür bəyanatlar qəbuledilməzdir və Rusiya-Azərbaycan münasibətlərinə xələl gətirir", deyə diplomat qeyd edib.

Qarşılıqlı Müttəfiqlik Fəaliyyəti haqqında Bəyannamənin imzalanması Azərbaycan-Rusiya münasibətlərində mühüm hadisədir. Bu, münasibətlərdə yeni mərhələ açan mühüm və hərtərəfli sənəddir. Onun imzalanması Rusiyanın Azərbaycanla uzunmüddətli əməkdaşlığı hədəflədiyini göstərir, deyə səfir qeyd edib.

O, Azərbaycan və Rusiya arasında quru sərhədinin açılmasının tərəfdarı olduğunu bildirib. Rusiyadan Azərbaycana turist axını daim artır. ""MİR" kartları ilə ödəniş imkanı Rusiyalı turistlərin Azərbaycana axınını artırmağa kömək edə bilərdi", deyən səfir əlavə edib ki, Rusiya Şanxay Əməkdaşlıq Təşkilatında Azərbaycana müşahidəçi statusu verilməsini dəstəkləyir. -02D-