Demokratik Qüvvələrin Milli Şurası Helsinki Komissiyasının nümayəndəsini demokratiyanı dəstəklədiyinə görə mükafatlandırıb

Vaşinqton/12.03.20/Turan: Demokratik Qüvvələrin Milli Şurası (DQMŞ) - Azərbaycanın müxalifət partiyaları alyansı ABŞ-ın Helsinki Komissiyasının aparat rəhbəri Kayl Parkeri "Azərbaycan demokratiyasının dostu" mükafatı ilə mükafatlandırıb. O, Azərbaycanda insan hüquqlarının müdafiəsinə dəstəkdə önəmli fəaliyyətinə görə təşəkkür əlaməti olaraq bu mükafata layiq görülüb.

Bu yaxınlara qədər Helsinki Komissiyasının rəhbəri olan Parker daha çox Maqnitski aktının əsas müəllifi kimi tanınır. O, həmçinin 2015-ci ilin sonlarında konqressmen Kris Smit tərəfindən təqdim olunmuş "Azərbaycanda demokratiya haqqında Akt" adlı qanun layihəsinin işlənib hazırlanmasında mühüm rol oynayıb. 

2017-ci ildə Helsinki Komissiyasının Azərbaycanla bağlı "Möhkəmlənmə və Azərbaycan Respublikasında qanunun aliliyinin və insan hüquqlarına hörmətin möhkəmləndirilməsi yolu ilə ABŞ-ın milli təhlükəsizlik və xarici siyasət məqsədlərinə yardım" adlanan ikinci qanun layihəsi qəbul edildikdən sonra Azərbaycan hökuməti bir sıra siyasi məhbusları azad etmək məcburiyyətində qalmışdı. 

"Cənab Parkerə və onun həmkarlarına insan hüquqlarını yaxşı anladıqlarına və belə kritik anda Azərbaycan və Rusiya kimi ölkələrlə təcrübi işlərinə görə dərin minnətdarlığımızı bildiririk", deyə DQMŞ sədri Cəmil Həsənli martın 12-də Helsinki Komissiyasında mükafatı Parkerə təqdim edərkən bildirib.

"Cənab Parkerə, konqressmen Kris Smitə və ABŞ-ın Helsinki Komissiyasındakı bütün dostlarımıza Azərbaycanda müstəqil səslərə dəstək vermək üçün etdikləri hər şeyə görə təşəkkür etmək üçün dorğu söz tapmaq çətindir", deyə Həsənli əlavə edib. -25B-