Demokratik Qüvvələrin Milli Şurası işgəncə siyasətinə qarşı etirazlara çağırıb

Bakı/11.09.23/Turan: Azərbaycanda vətəndaşlara qarşı inzibati zorakılıq və işgəncə halları yenidən artıb. Bu barədə Azərbaycan Demokratik Qüvvələrinin Milli Şurasının bazar ertəsi yaydığı bəyanatda deyilir.

Bu xüsusda ictimailəşmiş ən son məlumatlara görə:

- Dindar məhbus Ceyhun Balaşovu işgəncə ilə elektrik cərəyanına qoşmaqla əlil arabasına məhkum ediblər. Ceyhun Balaşov hazırda sərbəst hərəkət edə bilmir...

- Müsəlman Birliyi Hərəkatının İdarə Heyətinin üzvü Ağəli Yəhyayev dəhşətli işgəncələrə məruz qalıb. İşgəncələrin şiddətinə dözə bilməyib, etmədiyi cinayətlərə imza atıb. 

- Xocahəsən qəsəbəsinin Telman adlı axundu narkotik ittihamı həbs edilib, lakin məhkəmədə bəlli olub ki, onu şərləyiblər, saxta ittihamı üzərinə götürməsi üçün isə polis idarəsində hətta cinsi zorakılığa məruz qoyacaqları ilə də hədələyiblər.

"Azərbaycanda hazırkı iqtidarın hakimiyyətdə olduğu bütün illər ərzində inzibati zorakılıq və işgəncədən istifadə edilib. Hətta siyasi müxalifətin və vətəndaş cəmiyyətinin lider isimlərinə də işgəncə verilib. AXCP sədri Əli Kərimli, Milli Şura Koordinasiya Mərkəzinin və Müsavat partiyasının üzvü Tofiq Yaqublu, Milli Şura KM-in mərhum üzvü İbrahim İbrahimli, AXCP funksionerləri Fuad Qəhrəmanlı, Aqil Məhərrəmli, Babək Həsənov, Niyaməddin Əhmədov, Əlizamin Salayev, ictimai fəallar Bəxtiyar Hacıyev, Mehman Hüseynov və bir çox başqaları, ümumilikdə 100-lərlə insan müxtəlif zamanlarda və şəraitlərdə ciddi işgəncəyə məruz qalıblar.

Nardaran və Gəncə hadisələri zamanı həbs olunanlara, Tərtərdə hərbiçilərə kütləvi şəkildə verilmiş dəhşətli işgəncələr, o cümlədən Gədəbəyin Söyüdlü kəndində ekoloji problemlərinə görə etiraz edən sakinlərə qarşı aşırı polis zorakılığı ayrıca qeyd olunmalıdır

Sadalanan faktlar ölkədə inzibati zorakılıq və işgəncənin dövlət siyasətinə çevrildiyini göstərir", deyə Milli Şuranın bəyanatında bildirilir.

Son vaxtlarda dövlət orqanları səviyyəsində işgəncələrə yol verilməsinin yenidən intensiv xarakter alması göstərir ki, hökumət bu anti-insani, qanuna zidd əməldən idarəçilik aləti kimi istifadəni dayandırmaq fikrində deyil.

"Milli Şura ilk növbədə beynəlxalq birliyi, dünyanın demokratik ictimaiyyətini Azərbaycanda işgəncənin dövlət siyasətinə çevrilməsinə qarşı sərt mövqe bildirməyə çağırır".

"Milli Şura bəyan edir ki, üzləşdiyi bütün çətinliklərə, təqib və təzyiqlərə rəğmən İlham Əliyev hakimiyyətinin anti-demokratik, anti-xalq, anti-insani fəaliyyətinə qarşı mübarizəsini davam etdirəcək.

Milli Şura Azərbaycan xalqını bu mübarizədə ona daha kütləviliklə və daha cəsarətlə dəstək verməyə səsləyir", deyə DQMŞ-nin bəyanatında qeyd edilir. 0