“Dəniz kuboku” dördüncü ildir ki, Azərbaycanda keçirilir

Bakı/26.08.20/Turan: Rusiya Federasiyasının və Azərbaycan Respublikasının müdafiə nazirləri, ordu generalı Sergey Şoyqu və general-polkovnik Zakir Həsənov avqustun 25–də Azərbaycan HDQ-nin Puta hərbi dəniz bazasında keçirilən “Dəniz kuboku” Beynəlxalq Ordu Oyunları- 2020-ci il  müsabiqəsinə start veriblər. Bu barədə RF Müdafiə Nazirliyi məlumat verib.

“Dördüncü ildir ki, bu yarış Azərbaycanda keçirilir. Qonaqpərvərliyə və tədbirlərin yüksək səviyyədə keçirilməsinə görə Azərbaycan Respublikasının Prezidenti İlham Əliyevə, müdafiə naziri Zakir Həsənova səmimi minnətdarlığımı bildirirəm”, - açılış mərasimində Rusiya hərbi idarəsinin rəhbəri bildirib.

Sergey Şoyqu əmin olduğunu bildirib ki, yarış ölkələr arasında beynəlxalq əməkdaşlığın, qarşılıqlı etimadın və tərəfdaşlığın möhkəmlənməsinə xidmət edəcək.

“Əminəm ki, bu il keçirilən Dəniz kuboku” müsabiqəsi hərbçilərdə həmrəylik hissini oyadacaq”, - Zakir Həsənov vurğulayıb.

O qeyd edib ki, müsabiqə qonaqlara Azərbaycanı, respublikanın mədəniyyətini və tarixini daha yaxşı tanımağa imkan verəcək və xoş xatirələr yaradacaq.

“Dəniz kuboku-2020" müsabiqəsi sentyabrın 4-də başa çatacaq. Yarışlar zamanı dənizçilər dəniz və hava hədəflərini məğlub etmək üçün artilleriya atəşinin yerinə yeritilməsi, gəminin lövbərə dayanması, limana yan alması, xilasetmə hazırlığı, gəminin sağ qalması üzrə bacarıqlarını göstərməlidir.

Bu il yarışda iki komanda iştirak edəcək: Rusiya Federasiyasını Xəzər donanmasının “Mahaçqala” kiçik artilleriya gəmisi təmsil edəcək, Azərbaycan Respublikasının komandası “G-122” patrul gəmisində çıxış edəcək.-0—