Deputatlığa namizəd 45 saylı Abşeron Seçki Dairəsindəki pozuntular haqqında məlumat verir

Bakı/07.02.20/Turan: 45 saylı Abşeron Seçki Dairəsindən deputatlığa namizəd Emin Əliyev prezident İlham Əliyevə və Mərkəzi Seçki Komissiyasına seçki prosesinin pozulması ilə bağlı müraciət göndərib.

Müraciətdə deyilir: "9 fevral Milli Məclisə seçkilər ərəfəsində 45 saylı  Abşeron seçki dairəsində seçkilərin saxtalaşdırılmasına yönələn neqativ hallar qeydə alınır.

Təəssüf ki, məktəb direktorları və polis əməkdaşları bu işə cəlb ediliblər. Məktəb direktorlarının göstərişi ilə müəllimlər öz şagirdlərinin valideynlərinin şəxsiyyət vəsiqələrinin surətlərini və ünvanlarını toplayırlar. Abşeron rayonunda yaşayan, lakin ölkənin digər bölgələrində qeydiyyatda olan şəxslər seçki günü səsverməyə cəlb edilməsi üçün müvəqqəti olaraq polis bölmələrində qeydiyyata alırlar. Səsvermə haqda bildirişlər hətta yerli qeydiyyatı olmayan şəxslərə də verilir. Bu hərəkətlər seçki qanunvericiliyinin kobud şəkildə pozulmasıdır, düzgün və  ədalətli seçkilərin keçirilməsi prosesinə, dövlətin imicinə ciddi ziyan vurur.

Yaranmış vəziyyətlə əlaqədar 45 saylı Abşeron seçki dairəsində qanunsuz hərəkətlərin qarşısının alınması üçün müdaxilə etməyinizi xahiş edirəm".

Bu dairədən parlamentin keçmiş spikeri Oqtay Əsədov da deputatlığa namizədliyini irəli sürüb. Digər namizədlər E.Əliyevin müraciəti ilə bağlı şərh verməyiblər. -0-