Ermənistan XİN: Cenevrədə ermənilərin və Azərbaycanlıların Qarabağda birgə yaşaması mövzusu müzakirə olunmayıb

Yerevan/07.02.20/Turan: Yanvarın 29-30-da Cenevrədə Azərbaycan və Ermənistan XİN başçılarının görüşündə "Dağlıq Qarabağda ermənilərin və Azərbaycanlıların birgə yaşayış məntəqəsinin salınması" məsələsi müzakirə olunmayıb. Bu barədə bu gün Ermənistan XİN-in mətbuat katibi Anna Naqdalyan bildirib.

O, "Dağlıq Qarabağ prezidentliyinə namizəd" Vitali Balasanyanın Cenevrədə Ermənistan və Azərbaycan XİN başçılarının "Laçın rayonunun cənubunda ermənilərin və Azərbaycanlıların birgə yaşayış məntəqəsinin salınması" və "orada sülhməramlı qüvvələrin yerləşdirilməsi məsələsini müzakirə etdikləri" barədə bəyanatını belə şərh edib.

"Biz növbəti dəfə bu yalan və reallıqla heç bir əlaqəsi olmayan ehtimalları qəti şəkildə inkar edirik", deyə Ermənistan XİN-in mətbuat katibi bildirib.

Naqdalyan həmçinin bildirib ki, Qarabağın Azərbaycanlı icması "Qarabağla bağlı danışıqlar prosesində amil deyil". Onun sözlərinə görə, bu icma Azərbaycan hakimiyyətinin yaratdığı qeyri-hökumət təşkilatıdır və danışıqlarda amil kimi çıxş edə bilməz. Onun sözlərinə görə, danışıqları iki Ermənistan tərəfi (Ermənistan və Qarabağ) və Azərbaycan aparmalıdır.

Beləliklə, Ermənistan XİN ABŞ səfiri Li Litsenbergerin Bakıda Qarabağın Azərbaycanlı icmasının rəhbəri Tural Gəncəliyevlə görüşünə reaksiya verib. -02D-