Dörd ölkənin XİN başçıları Xəzər-Qara dəniz dəhlizini inkişaf etdirmək barədə razılığa gəliblər

Bakı/04.03.19/Turan: Martın 4-də Buxarestdə Rumıniya, Azərbaycan, Gürcüstan və Türkmənistan XİN başçılarının görüşü bəyannamənin imzalası ilə yekunlaşıb.

İmzalanmış sənəddə tərəflər Qara dəniz - Xəzər (BSCS) beynəlxalq nəqliyyat dəhlizinin yaradılmasına və inkişafına şərait yaratmaq öhdəliyi götürürlər. Bu məqsədlə ölkələr bütün texniki məsələlərin həlli üçün ekspert işçi qrupu yaradacaqlar.

Tərəflər gömrük, ixrac-idxal prosedurlarının, qanunvericiliyin sadələşdirilməsi və milli operatorlar arasında əməkdaşlıq qurulması, sözügedən marşrut boyunca nəqliyyat infrastrukturunun möhkəmləndirilməsi və Avropa qurumlarının bu işdə iştiraka cəlb edilməsi məqsədilə öz addımlarını razılaşdırmaq, görüşlümş işlərə nəzarət üçün nazirlər səviyyəsində müntəzəm görüşlər keçirmək öhdəliyi götürürlər. Bu barədə Azərbaycan XİN-in mətbuat xidmətində bildirilir. -02D-