Dövlət Departamenti: Putinin Ukraynadakı müharibəsi ərazi bütövlüyünün vacibliyini göstərdi

Vaşinqton/28.03.23/Turan: Ukraynadakı münaqişə bu çərşənbə başlayacaq demokratiya uğrunda sammitdə mühüm müzakirə mövzusu olacaq, Dövlət Departamentində bildiriblər.

"Əlbəttə, Rusiyanın Ukraynaya amansız hücumu, şübhəsiz ki, müzakirə mövzusu olacaq",- bazar ertəsi brifinqdə Dövlət Departamentinin mətbuat katibinin müavini Vedant Patel Turan-ın müxbirinin sualınıb cavabında deyib.

Bu gün dövlət katibi Entoni Blinken Ukrayna prezidenti Vladimir Zelenskinin iştirakı ilə "Ukraynada ədalətli və davamlı sülh" mövzusunda virtual sessiya keçirəcək.

"Ukraynadakı münaqişə və müharibə Birləşmiş Millətlər Təşkilatının Nizamnaməsinə, ərazi bütövlüyü və suverenlik prinsipinə riayət və hörmət edilməsinin vacibliyini ortaya qoyur",- Patel deyib.

"Bu yüzilliyin müəyyənedici sualı bu dəyişən dünyada demokratiyaların öz xalqlarına fayda gətirib-gətirməyəcəyindən ibarətdir”, - o əlavə edib.

Demokratiya sammiti 120 ölkəni, vətəndaş cəmiyyəti qruplarını və texnoloji şirkətləri, eləcə də hüquq-müdafiə qruplarının demokratiyanın vəziyyətilə bağlı narahatlıqlarını ifadə etdikləri ölkələri bir araya gətirəcək. 0