Dövlət Departamenti Qarabağda atəşkəs elan edilməsinin ildönümü barədə

Vaşinqton/09.11.21/Turan: Bu həftə Birləşmiş Ştatlar və beynəlxalq birlik Cənubi Qafqazda Ermənistan və Azərbaycan qüvvələri arasında 44 günlük şiddətli hərbi əməliyyatlara son qoymuş atəşkəsin elan edilməsinin ildönümünü qeyd edir.

«Ötən il hərbi əməliyyatlar zamanı həlak olanların və yaralananların ailələrinə dərin hüznlə başsağlığı veririk", - ABŞ Dövlət Departamentinin bazar ertəsi yaydığı bəyanatda deyilir.

«Biz həbsdə qalan bütün şəxslərin qaytarılmasına, itkin düşənlərin tam uçotunun aparılmasına, məcburi köçkünlərin öz evlərinə könüllü qayıtmasına, münaqişə rayonlarında hərtərəfli humanitar minatəmizləməyə və beynəlxalq humanitar təşkilatların ehtiyacı olanlara çıxışının təmin edilməsinə çağırırıq.

Biz həmçinin insan hüquqlarının və beynəlxalq humanitar hüququn ehtimal olunan pozuntularının araşdırılmasına çağırırıq", - Dövlət Departamentinin nümayəndəsi Ned Prays deyib.

Birləşmiş Ştatlar "Cənubi Qafqaz regionu üçün təhlükəsiz, sabit, çiçəklənən və dinc gələcəyin təmin edilməsi işinə əvvəlkitək sadiqdir", - o qeyd edib.

Dövlət katibinin Avropa və Avrasiya Məsələləri Bürosunun köməkçisinin müavini Erik Olson üç ölkə ilə ikitərəfli məsələləri müzakirə etmək və regional əməkdaşlıq imkanlarını öyrənmək üçün hazırda regiondadır.

"Biz Ermənistan və Azərbaycanı Dağlıq Qarabağ münaqişəsilə əlaqədar həll olunmamış və ya ondan irəli gələn bütün məsələlərin hərtərəfli həlli üçün Minsk Qrupu həmsədrlərinin himayəsilə əməkdaşlığı davam etdirməyə və fəallaşdırmağa çağırırıq",- Dövlət Departamentinin bəyanatında bildirilir. -25B-