Dövlət Departamenti Rusiya və Gürcüstan arasında birbaşa reyslərin açılmasından narahatlığını bir daha bildirir

Vaşinqton/23.05.23/Turan: Bazar ertəsi Dövlət Departamenti Rusiya və Gürcüstan arasında birbaşa aviareyslərin açılması ilə bağlı narahatlığını bir daha ifadə edib. Rusiyanın "Azimut" aviaşirkətinin sərnişin təyyarəsi 2019-cu ildən bəri ilk dəfə ötən həftə Tbilisiyə enib.

"Biz Rusiya və Gürcüstan arasında birbaşa reyslərin bərpasından narahatıq. Bu o demək ola bilər ki, Gürcüstanın hava limanlarındakı şirkətlər sanksiyalara məruz qalar",- gündəlik brifinq zamanı mətbuat katibi Metyu Miller Turan-ın sualının cavabında bildirib.

O xatırladıb ki, bir çox Qərb ölkələri, o cümlədən ABŞ  Rusiya təyyarələrinin hava məkanına daxil olmasını qadağan edir.

"Biz, bütün Qərb birliyi bu rejimdən uzaqlaşdıq və hazırda Rusiya ilə qarşılıqlı əlaqəni genişləndirməyin vaxtı deyil", - Miller deyib.

2008-ci ildə Rusiya Gürcüstana hücum edərək Abxaziya və Cənubi Osetiyanı işğal etdikdən və orada separatçı rejimlər qurduqdan sonra Moskva və Tbilisi arasında rəsmi diplomatik münasibətlər yox idi. 0