Dövlət Departmenti: Minsk Qrupunun həmsədrləri Bakıya və Yerevana səfər edəcəklər

Vaşinqton/09.12.20/Turan: Bu həftə sonu ABŞ-ın Dağlıq Qarabağ münaqişəsi üzrə baş nümayəndəsi Qarabağ münaqişəsinin nizamlanmasında ATƏT-in Minsk Qrupunun rolunu müzakirə etmək üçün Bakıya və Yerevana səfər edəcək, bu barədə Turan-ın Vaşinqton müxbiri məlumat verib. 

Amerikalı həmsədr Endryu Şofer hazırda Cenevrədə səfərdədir və "öz rollarına necə qayıda biləcəklərini görmək və diplomatik həllə nail olmaq üçün irəliləyiş əldə etməyə çalışmaq üçün" digər həmsədrlərlə birlikdə Azərbaycana və Ermənistana səfər edəcək, deyə dövlət katibinin Avropa və Avrasiya məsələləri üzrə köməkçisi Filip Riker çərşənbə axşamı, dekabrın 8-də Helsinki Komissiyası qarşısında çıxış edərkən bildirib. 

Vaşinqton Dağlıq Qarabağdakı vəziyyəti "diqqətlə izləməyə" davam edəcək. "Biz Avropada - Ukraynada, Moldovada və Gürcüstandakı uzun münaqişələri, həmçinin Dağlıq Qarabağ münaqişəsini ATƏT-in diqqət mərkəzində saxlayacağıq. Biz Dağlıq Qarabağ münaqişəsinin ədalətli və möhkəm həllinin axtarışı üçün Minsk Qrupunun həmsədrlərindən istifadə etməyə davam edəcəyik. Hərbi əməliyyatların dayandırılması yalnız ilk addımdır. İstənilən möhkəm həll Helsinki Yekun Aktında yer alan prinsiplərə əsaslanmalıdır", deyə Riker bildirib. 

"Bu və digər məsələlərlə bağlı irəliləyiş əldə etsək də, dərin fikir ayrılıqları, xüsusən Azərbaycan, Ermənistan və əksər ölkələr arasındakı fikir ayrılıqları daha konkret və ciddi nailiyyətlər üçün maneə olaraq qalmaqda davam edir", deyə o əlavə edib. 

ABŞ münaqişə zonasında hərbi əməliyyatların dayandırılmasını alqışlayır və insanların, o cümlədən dinc sakinlərin ölümünə görə "dərin təəssüf hissi keçirir": "Bu həyatlar qayıtmayacaq". 

Onun sözlərinə görə, Ermənistan və Azərbaycana yardım üçün yaradılmış Minsk Qrupu həll yolu tapmaq üçün "ən yaxşı imkandır". 

"Biz əvvəlki kimi hesab edirik ki, burada uzunmüddətli hərbi həll yoxdur", deyən Riker izah edib ki, illər əvvəl Ermənistanın döyüş meydanında qələbəsi münaqişənin başa çatmasına gətirib çıxarmayıb və Minsk Qrupu "tarazlığı diplomatiya vasitəsilə qoruyub saxlamağa çalışıb". İndi, bu yaxınlarda baş vermiş döyüş əməliyyatlarının nəticələrini nəzərə alaraq, razılaşmaları danışıqlar masası arxasında həmsədrlərin köməyi ilə möhkəmləndirmək lazımdır", deyə o bildirib. 

Vaşinqton həmçinin Moskva və Parislə işləyir, belə ki, onun Rusiyanın tətbiq etdiyi atəşkəslə, habelə Türkiyənin rolu ilə bağlı "çox sayda sualı var", deyə Riker qeyd edib. -25B-