Media-icmal 09.12.20

“Azərbaycan” qəzeti  “Baş infeksionist: Aparılan karantin tədbirlərinə baxmayaraq epidemioloji durum son həftələr pisləşməkdə davam edir” sərlövhəli məqalədə Azərbaycanda koronavirusa qarşı mübarizəni dəyərləndirir.

Mütəxəssislərin fikrincə, aparılan karantin tədbirlərinə baxmayaraq, epidemioloji durum son həftələr pisləşməkdə davam edir.

Ekspertlərə görə, vəziyyəti pisləşdirən hallar ondan ibarətdir ki, özündə xəstəliyin olduğunu bilən və ya ən azı güman edən xəstələr özlərini cəmiyyətdən təcrid etmirlər.

“Məhz belə bir şəraitdə fərdi qoruyucu vasitələrdən düzgün və hamılıqla istifadə edərək maksimum yararlanmaq çox vacibdir... özümüzü qorumaqla həm yaxınlarımızı, həm də bütünlükdə xalqımızı qorumuş olarıq”, deyə mütəxəssislər bəyan edirlər.

Mütəxəssislərə görə, indiki halda çıxış yolu qoruyucu vasitələrdən hamılıqla və düzgün istifadə etməkdə, təmasları azaltmaqda, sosial məsafə saxlamaqda və gigiyena qaydalarına əməl etməkdədir.

“Müsavat.com” saytında “Ermənistana artıq ordu lazım deyil - bu ölkə azı 15 il özünə gələ bilməyəcək” sərlövhəli məqalədə Ermənistanda ordu quruculuğunun perspektivi şərh edilir. 

Məqalədə deyilir ki, əgər ermənilər 44 günlük İkinci Qarabağ savaşında Ermənistan ordusunun darmadağın edilməsini təkcə bu ölkənin hakimiyyətinin fəaliyyətinə bağlayırsa, səhv edir. Məqalədə vurğulanır ki, Ermənistanda indi də müharibəyə çağırışlar eşidilməsi bu ölkədə nikbinliyə əsas vermir.

Müəllif deyir ki, Ermənistan düşdüyü indiki vəziyyətdən azı 15 il ərzində çıxa bilməyəcək və bu, Azərbaycanın Vətən müharibəsində əldə etdiyi ən böyük uğurlardan biridir.

Müəllif əlavə edir ki, erməni tərəf İkinci Qarabağ müharibəsində verdiyi itkiləri tam açaıqlamır, gerçəkdə Ermənistanın 10 minə yaxın itkisi var, şəxsi heyətin 25 faizini itirib, hərbi arsenalının 65 faizindən məhrum olubdur.  

“Redaktor.az” saytı isə “Xəstəxanalarda yer yoxdur, dərman 100-150 manat... – vəziyyət ağırlaşır” sərlövhəli məqalədə Azərbaycanda koronavirus infeksiyası ilə mübarizədə problemlərə diqqət çəkir.

Ölkədə koronavirusla mübarizədə vəziyyətin ağırlaşmasını ictimai-siyasi xadimlər də gözardı etmirlər. Bildirirlər ki, koronavirusla mübarizə xeyli çətinləşib, xəstəxanalarda yer tapmaq mümkün deyil, xəstəliyə yoluxmuş insanların çoxu evdə necə gəldi müalicə olunurlar. Onların fikrincə, qoruyucu vasitələrdən istifadə etməməyə görə cərimələr belə bu istiqamətdə vəziyyəti yaxşılaşdıra bilmir. Bu şəxslərə görə, əsas problem test üçün təyin olunan qiymətlərin çox baha olmasındadır.

Əksər insanlar 100-150 manat vəsaiti olmadığı üçün müxtəlif əlamətlərə görə xəstəliyin başladığını müəyyən etmək üçün yaxınlarının və ya tanışlarının tətbiq etdiyi üsullardan istifadə edirlər.

Məsələ bununla bitmir, bir klinikada neqativ çıxan test, görürsən sabah başqa klinikada pozitiv çıxır, buna görə vətəndaş kompüter tomoqrafiyası vasitəsi ilə ciyərlərini yoxlatmaq üçün 90-110 manat ödəməli olur. Əgər xidmət evə çağırılarsa, bu, 180 manata qədər vəsait ödənişi deməkdir.

Burada kimlərisə tənqid etməyin yeri yoxdur, əsas məsələ problemdən təcili çıxış yolu tapılmasındadır.