Azər Qasımlı: Həbsimi söz azadlığına qəsd kimi dəyərləndirirəm

Siyasi Menecment İnstitutunun həbsdə olan direktoru Azər Qasımlı bildirib ki, onun həbsinin “siyasi sifariş əsasında həyata keçirildiyini” hər kəs bilir və anlayır.

Azər Qasımlının facebook səhifəsində onun adından yayılan bəyanatda deyilir ki, ona qarşı irəli sürülən ittihamnamədə bir dənə də olsun sübut yoxdur.

“Məhkəmədə də vəkilimin “heç olmasa bir dənə ilkin sübut göstərə bilərsinizmi?” sualına müstəntiq sükutla cavab verdi. Bu nəinki təqsirsizlik prezumpsiyasının pozulması, ümumilikdə qanunun, hüququn tapdanmasıdır”, o qeyd edib.

Azər Qasımlı özünün günahsız olması barədə kifayət qədər sübutunun olduğunu bildirir.

“Bu ittihamın mənim təbiətimə nə qədər zidd olduğunu məni tanıyan hər kəs bilir. Mən hətta övladlarımı belə təhdidlə yox, təşviqlə tərbiyə etmişəm. Məni yalnız bir səbəbə görə həbs ediblər. Həqiqətləri danışdığıma görə. Mənim dediyim həqiqət budur: Azərbaycanın milli maraqları hüquqi dövlətin, azad iqtisadi mühitin və demokratiyanın gətirəcəyi tərəqqiyə söykənir. Mən nə qərbyönümlüyəm, nə şimalyönümlü, nə də cənubyönümlü. Mən Azərbaycanyönümlüyəm! Lakin bununla yanaşı ölkəmizin təhlükəsizliyini riskə atmadan Qərblə dərin əməkdaşlığın, Avropa Birliyinə və müasir dünyaya inteqrasiyanın tərəfdarıyam. Və bunun da milli maraqlarımıza uyğun olduğunu düşünürəm. Bütün bunları nəzərə alaraq həbsimi söz azadlığına qəsd kimi dəyərləndirirəm”, o qeyd edib.

Ötən il dekabrın 8-də Siyasi Menecment İnstitutunun rəhbəri Azər Qasımlı Cinayət Məcəlləsinin 182.2.3-cü (Hədə-qorxu ilə tələb etmə, zor tətbiq etmə ilə törədildikdə) maddəsilə şübhəli şəxs qismində saxlanılıb.

“Azər Qasımlıya borclu olan bir şəxs var. Məhkəmələri Qasımlı udmuşdu. İndi həmin adamı çağırıblar, guya Azər Qasımlı ondan hədə-qorxu ilə pul tələb edib”, vəkil Aqil Layıc Amerikanın Səsinə deyib.

Azər Qasımlı ittihamı qəbul etmir və məhkəmədə saxlanılmasının ictimai-siyasi fəaliyyəti ilə bağlı olduğunu bildirib.

Bundan öncə, noyabrın 25-də Siyasi Menecment İnstitutunun rəhbəri Azər Qasımlı Bakı şəhər Baş Polis İdarəsində şahiq qismində dindirilib. O, üç saat yarımdan sonra sərbəst buraxılıb.

Qasımlı saxlanılan zaman rəhbərlik etdiyi Siyasi Menecment İnstitutunun fəaliyyəti barədə xeyli suallar verildiyini deyib.