Beynəlxalq komitə İqbal Əbilovu müdafiə edir

Beynəlxalq Narahat Alimlər Komitəsi həbs edilmiş tədqiqatçı İqbal Əbilovun azad edilməsinə köməklik göstərmək xahişi ilə Azərbaycan prezidenti İlham Əliyevə müraciət edib. 

Komitə Əbilovun həbsinin "onun Ermənistan alimləri ilə birlikdə Azərbaycanın etnik azlıqlarını tədqiq etməsi ilə bağlı ola biləcəyindən" narahatdır.

Əbilovun saxlanma şərtlərindən narahatlığını ifadə edən Komitə onu azad etməyi və tədqiqatlar və pedaqoji fəaliyyətlə məşğul olduğu Belarusa qayıtmasına icazə verməyi xahiş edir.  

Öz növbəsində, Azərbaycan Hüquq Müdafiə Mərkəzinin rəhbəri Eldar Zeynalov da Əbilova qarşı ittihamlara inanmır.

Təqsirsizlik prezumpsiyası və istintaq sirri pozulmaqla, KİV-ə Əbilovun ittiham olunduğu əməllər haqqında məlumat sızdırılıb.

Əbilov guya "Ermənistan xüsusi xidmətlərinin nəzarəti altında" fəaliyyət göstərən erməni alim-İranşünas Qarnik Asatryan və Yerevan Dövlət Universitetinin kafedra müdiri Vardan Voskanyanla əməkdaşlıq etməkdə ittiham olunur. Zeynalovun fikrincə, bu şəxslərin Ermənistan xüsusi xidmətləri ilə əməkdaşlığı sübut olunmayıb.

Əbilovun hüquqlarının müdafiəsi ilə bağlı ilk gündən problemləri olub. Həbsindən bir ay əvvəl o, 6 saat ərzində dindirilib, ondan ölkəni tərk etməmək haqqında iltizam alınmayıb. 5 gün sonra o, aerportda reysə buraxılmayıb, telefonu və pasportu əlindən alınıb. Onun ailə üzvləri ilə əlaqə saxlamasına və bu barədə onlara məlumat verməsinə imkan verilməyib.

Belarusda alim olan və daimi yaşayan Əbilov Azərbaycanda heç bir vəzifə tutmayıb. O, hərbi xidmətdə olmayıb, Azərbaycana qarşı müharibədə iştirak etməyib və buna görə dövlətə xəyanət edə bilməzdi, Zeynalov belə hesab edir. 

Əbilovun talış dili, mədəniyyəti və tarixi ilə bağlı araşdırmaları yanlış olaraq milli ayrı-seçkilik salmaq kimi şərh olunur. 

Əbilov əvvəllər də Azərbaycana gəlirdi, lakin hakimiyyətlə problemi olmayıb.

"Onun məhz indi həbs edilməsi bunun Avropa ilə münasibətlərdə hazırkı gərginliklə əlaqəli olduğu haqqında təəssürat yaradır. Axı AŞPA da, Avropa Parlamenti də son illər Azərbaycan hökumətinin tənqidində milli azlıqların hüquqları mövzusundan fəal şəkildə istifadə edirdilər. O cümlədən, talışların vəziyyətinə diqqət çəkirdilər. Bu, Əbilovun həbsi haqqında qərarda öz rolunu oynamış ola bilər", deyə Zeynalov qeyd edib.

Zeynalov Əbilovun işini daha əvvəl həbs edilmiş talış tədqiqatçıların - mərhum Novruzəli Məmmədovun və Hilal Məmmədovun işləri ilə müqayisə edib. 

* İqbal Əbilov 22 iyul 2024-cü il tarixində dövlətə xəyanət, xarici təşkilatların tapşırığı ilə dövlət əleyhinə çağırışlar, milli və dini ayrı-seçkilik salmaq ittihamları ilə saxlanılıb. Bütün bu cinayətlərin Ermənistan xüsusi xidmətlərinin göstərişi ilə törədildiyi iddia olunur. 

Əbilov ittihamları təkzib edir və müstəsna olaraq elmi fəaliyyətlə məşğul olduğunu bildirir. Dünyanın müxtəlif ölkələrindən olan alimlərdən ibarət böyük bir qrup Əbilovun azad edilməsinə köməklik etmək xahişi ilə Azərbaycan rəhbərliyinə müraciət edib. Hüquq müdafiəçiləri Əbilovu siyasi məhbus kimi tanıyıblar.

19 noyabr 2024-cü il tarixində məhkəmə Əbilovun həbs müddətini 4 ay uzadıb.