Tofiq Yaqublu istintaqın saxtalaşdırılmasını ifşa edir

Yanvarın 10-da Bakı Ağır Cinayətlər Məhkəməsində Demokratik Qüvvələrin Milli Şurasının və Müsavat Partiyasının üzvü Tofiq Yaqublunun işi üzrə növbəti iclas gərgin atmosferdə keçib.

İclasda "dəlillərin tədqiq edilməsi" davam etdirilib.

Yaqublu bu işin digər fiqurantı Elnur Vaqifoğlu və zərərçəkmiş Elşən Hüseynov arasında WhatsApp yazışmasında məntiqi uyğunsuzluqlar olduğuna diqqət çəkib. Siyasətçi bildirib ki, yazışma istintaq tərəfindən saxtalaşdırılıb.

Bundan başqa, müdafiə tərəfi mobil rabitə operatorlarının anten məlumatlarına əsasən, Vaqifoğlu və Hüseynov 8 dekabr 2023-cü il tarixində 15.45-də metronun "Gənclik" stansiyasının yaxınlığında görüşə bilməzdilər. Çünki həmin vaxt Vaqifoğlu oradan uzaqda - Mehdiabadda idi.

Buna görə istintaqın Hüseynovun guya ona "Şengen vizası təşkil etməyi vəd edən" Yaqubluya çatdırması üçün Vaqifoğluna pul verdiyi haqqında iddiası tamamilə əsassızdır, müdafiə tərəfi belə hesab edir.

Hakim Elnur Nuriyev Yaqubluya "hər bir cümlə haqqında fikir bildirsə prosesin aylarla davam edəcəyi" haqqında irad tutmasından sonra zalda vəziyyət gərginləşib.

Buna cavab olaraq Yaqublu bildirib ki, o, onsuz da artıq bir ildən çoxdur həbsdə saxlanılır. Digər tərəfdən, hakimlərin işi də məhz araşdırma aparmaqdır, buna görə də hakimin sözləri yersizdir.

Yaqublu hakim Nuriyevin dələduzluq yolu ilə 165 nəfəri aldatmaqda təqsirli bilinən şəxsi həbsdən azad etdiyini qeyd edərək, onu qeyri-obyektivlikdə də ittiham edib.

Cavab olaraq hakim Yaqubludan "onun digər işlərinə qarışmamağı" tələb edib.

Yaqublu çıxışı zamanı üzünü hakimlərə deyil, zala tutduqda Nuriyev siyasətçini prosesi onun iştirakı olmadan davam etdirməklə təhdid edib.

Bu, prosesdə iştirak edənləri qəzəbləndirib və zalda səs-küy yaranıb.

Hakim bir neçə şəxsi, o cümlədən Yaqublunun kürəkəni və mübarizə yoldaşı - AXCP-nin sədr müavini, DQMŞ-nin üzvü Seymur Həzini zaldan çıxarıb.

Bu iş üzrə növbəti iclas yanvarın 17-nə təyin edilib.

* Xatırladaq ki, Demokratik Qüvvələrin Milli Şurasının və Müsavat Partiyasının üzvü Tofiq Yaqublu 14 dekabr 2023-cü il tarixində dələduzluq, sənədləri saxtalaşdırma və qanunsuz olaraq rəsmi sənədlər hazırlama və saxta sənədlərdən istifadə etmə ittihamı ilə həbs olunub.
Yaqublu ittihamları uydurma adlandırıb. Siyasətçi əvvəllər də dəfələrlə cinayət təqibinə və inzibati təqibə məruz qalıb. Beynəlxalq təşkilatlar onu vicdan məhbusu kimi tanıyıblar.