Dövlət Dumasının deputatı öz həmkarının Qarabağa dair bəyanatını tənqid edib

Moskva/21.11.19/Turan: Rusiya-Azərbaycan parlamentlərarası dostluq qrupunun rəhbəri, RF Federal Məclisi Dövlət Dumasının deputatı Dmitri Savelyev deputat Konstantin Zatulinin Vladimir Poznerə verdiyi qalmaqallı müsahibəsini şərh edib. Müsahibə bir neçə gün öncə Rusiyanın Birinci telekanalında nümayiş etdirilib.

“Konstantin Zatulinin tez-tez çox mübahisəli mövqe tutan cənab Poznerlə söhbətində söylədiyi şəxsi fikirlərinin heç bir əsası yoxdur.

Zatulinin də bu cür fəal müdafiə etdiyi Dağlıq Qarabağın özünütəyinetmə hüququ yalnız referendum zamanı həyata keçirilə bilər. Lakin referendumun real hüquqi qüvvəyə  malik olması üçün bütün qaçqınları öz evlərinə qaytarmaq lazımdır. Belə ki, onlar öz vətənlərinin gələcək taleyini müəyyən etmək üçün tam hüquqa malikdirlər.

Ancaq hazırda bu, Ermənistan tərəfindən işğal edilmiş Azərbaycan ərazisidir və Azərbaycan vətəndaşları həmin  işğal olunmuş rayonların müstəqilliyi barədə fikirlərini qanuni yolla ifadə edə bilmədikləri üçün belə referendumun keçirilməsi mümkün deyil.

Yəni, Dağlıq Qarabağ münaqişəsi ilə bağlı danışıqlarda hansısa üçüncü tərəfin (qondarma “Arsax”) iştirakından danışmaq mümkün deyil. Rusiyanın da rəsmi mövqeyi budur ki, Qarabağ problemini aralarında ərazi münaqişəsinin yarandığı iki tərəf danışıqlar yolu ilə həll etməlidir.

Beynəlxalq hüquqa əməl edilməli, Azərbaycanın bütövlüyü bərpa olunmalı,  erməni qoşunları heç bir əlavə şərt qoyulmadan işğal olunmuş ərazilərdən geri çəkilməlidir.

“Üçüncü” tərəf ətrafındakı müxtəlif spekulyasiyalar isə bu uzadılmış problemin tezliklə həllinə mane olur”, -  D.Savelyevin Turan-a göndərdiyi şərhdə deyilir.02D-