Dövlət Təhlükəsizliyi Xidməti: Azərbaycan ərazisində terror təhlükəsinin olması ilə bağlı məlumatlar əsassızdır

Bakı/19.05.21/Turan: Azərbaycan Dövlət Təhlükəsizliyi Xidməti Amerika Birləşmiş Ştatlarının Dövlət Departamentinin ABŞ vətəndaşlarına Azərbaycana səyahətlə bağlı xəbərdarlığına münasibət bildirib.

Dövlət Təhlükəsizliyi Xidməti bildirir ki, Azərbaycan ərazisində terror təhlükəsinin olması ilə bağlı məlumatlar əsassızdır

“Amerika Birləşmiş Ştatlarının Dövlət Səyahət Departamentinin rəsmi İnternet səhifəsində ABŞ vətəndaşlarına Azərbaycanda COVİD-19 koronavirus infeksiyası və yüksək terror təhlükəsi riski ilə əlaqədar məlumat verilib, onlara ciddi zərurət olmadığı təqdirdə ölkəmizə səyahət etməmələri tövsiyə olunub. Qeyd olunan məlumat sosial media resurslarının Azərbaycan seqmentində yayılıb.

Bununla əlaqədar bəyan edirik ki, Azərbaycan Respublikasının ərazisində terror təhlükəsinin olması ilə bağlı verilən bu kimi məlumatlar həqiqəti əks etdirmir və tamamilə əsassızdır.

Eyni zamanda bildiririk ki, Azərbaycan prezidenti İlham Əliyevin rəhbərliyi ilə həyata keçirilən uğurlu hüquq- mühafizə və təhlükəsizlik siyasəti nəticəsində ölkəmizdə yaradılmış dayanıqlı sabitlik və əmin-amanlıq vətəndaşlarımızın, həmçinin Azərbaycana gələn əcnəbilərin təhlükəsizlik şəraitində yaşamasına təminat verir. Hazırda ölkəmizə səyahət etmək istəyən şəxslər üçün  hər hansı terror təhlükəsi riski mövcud deyil”, -  Dövlət Təhlükəsizliyi Xidmətinin məlumatında deyilir.

ABŞ Dövlət Departamentinin xəbərdarlığında ABŞ vətəndaşlarına Azərbaycana və Ermənistana səyahət etməmək tövsiyə edilir.

ABŞ Azərbaycanla bağlı səyahət məsləhətlərini ən yüksək səviyyəyə, 4-cü səviyyəyə (qırmızı) qaldırıb və vətəndaşlarına səyahət etməməyi tövsiyə edib.

Dövlət Departamenti xəbərdarlıqda səbəb kimi koronavirus və sərhəddəki gərginlik, terror təhlükəsini göstərib.-03-