DQMŞ prezidentliyə vahid namizədin öhdəliklərini təsdiqləyib (YENİLƏNİB)

Bu gün Demokratik Qüvvələrin Milli Şurası (DQMŞ) sessiyasının iştirakçıları keçid dövrü və prezidentliyə vahid namizədin öhdəlikləri haqda memorandumu qəbul ediblər. 

11 bənddən ibarət sənəddə MŞ-dən prezidentliyə vahid namizədin öhdəlikləri əksini tapıb.   2013-cü il prezident seçkilərində DQMŞ-nin prezidentliyə vahid namizədi üzərinə aşağıdakı öhdəlikləri götürür:

1. Səlahiyyət müddətinin iki illə (keçid dövrü) məhdudlaşdırılacağı ilə razılaşmaq; 

2. Cəmiyyətin potensialı və Demokratik Qüvvələrin kadr bazası əsasında geniş koalisiyalı müvəqqəti və DQMŞ-in etimad göstərdiyi “Milli Etimad Hökuməti” formalaşdırmaq;

3. Referendum (ümumxalq rəy sorğusu) yolu ilə:

- 2013-2015-ci illər ərzində (keçid dövrü) konstitusiya və seçki islahatları aparmaq, prezident hakimiyyətinin məhdudlaşdırılması, parlamentin və hökumətin səlahiyyətlərinin genişləndirilməsi yolu ilə hakimiyyətin qolları arasında tarazlığı, eyni zamanda məhkəmə hakimiyyətinin müstəqilliyini təmin etmək;

- 2014-cü ilin yanvarında parlamenti buraxmaq;

proporsional seçki sistemini bərpa etmək və qarışıq seçki sistemi əsasında yeni parlament seçkiləri keçirmək;

yerli özünüidarə orqanlarının səlahiyyətlərini genişləndirmək, şəhər (rayon) icra hakimiyyəti orqanlarının səlahiyyətlərini məhdudlaşdırmaq. 

4. qanunvericiliyin beynəlxalq standartlara və Azərbaycanın üzərinə götürdüyü öhdəliklərə uyğunlaşdırılması üçün tədbirlər görmək; 

5. ölkədə bütün partiya və hərəkatlar, ictimai birliklərə azad və bərabər fəaliyyət imkanları yaratmaq;

6. əsas insan hüquq və azadlıqlarının (mülkiyyət, azad sahibkarlıq, azad və ədalətli seçki, ifadə, sərbəst toplaşmaq, dini etiqad və s.) təmin olunması üçün tədbirlər görmək, özəl televiziya və radio kampaniyalarının yaradılması və fəaliyyətinə maneələri aradan qaldırmaq;

7. siyasi əsaslarla cinayət təqibinə məruz qalmış və məhkum olunmuş şəxslərin hüquqlarının bərpa olunması, cinayət təqiblərinə son qoyulması, həbsdə olanların azad edilməsi və mühacirətdə olanların ölkəyə sərbəst qayıtmaları üçün hüquqi maneələrin aradan qaldırılması;

8. ölkədə mövcud olan total korrupsiya sisteminin, inhisarçılığın, gizli iqtisadiyyatın aradan qaldırılması və bu səbəbdən hüquqları pozulmuş vətəndaşların, iş adamlarının pozulmuş hüquqlarının, sosial ədalətin bərpası üçün təxirəsalınmaz tədbirlər görmək; 

9. Milli Şuranın təsis bəyannaməsinə uyğun xarici siyasət xətti yeritmək, Qarabağ probleminin Azərbaycanın milli maraqlarına uyğun həllinə çalışmaq;

10. 2015-ci ildə prezident seçkilərinin keçirilməsini təmin etmək;

11. 2015-ci il prezident seçkilərində namizədliyini irəli sürməmək və seçki proseslərində tərəfsizliyini saxlamaq.—03C06--

2013 İyul 02 (Çərşənbə axşamı) 11:40:07

İyulun 2-də Müsavat Partiyasının mənzil-qərargahında Demokratik Qüvvələrin Milli Şurasının (DQMŞ) ikinci sessiyası keçirilir. Sessiyanın gündəliyinə keçid dövrü, müxalifətin vahid namizədinin öhdəlikləri, prezidentliyə vahid namizədin irəli  sürülməsi,  Milli Məclisə, Baş Prokurorluğa və MSK-ya müraciətlərin qəbul olunması, vahid namizədin seçki qərargahının formalaşdırılması haqda tövsiyə qərarı və cari məsələlər daxildir. 

Hazırda sessiya iştirakçıları memorandum layihəsini müzakirə edirlər.—03B06-