DTX-nin Ağstafa icra başçısının və Yevlaxın keçmiş icra başçısının saxlanılması haqqında məlumatı

Bakı/20.12.19/Turan: Dövlət Təhlükəsizlik Xidməti (DTX) dekabrın 19-da axşam Ağstafa rayon İcra Hakimiyyəti başçısı Nizaməddin Quliyev, onun müavini Ramiz Tatarov, habelə Yevlax şəhərinin keçmiş icra başçısı Qoca Səmədovun saxlanılması haqqında məlumatları təsdiq edib.

Yerli icra hakimiyyəti orqanlarının vəzifəli şəxsləri tərəfindən vətəndaşların hüquqlarına, dövlətin qanunla qorunan mənafelərinə zərər vuran, dövlət orqanlarının fəaliyyətinə kölgə salan qanunsuz əməllərə yol verilməsinə dair məlumatlar əsasında kompleks araşdırma tədbirləri həyata keçirilib, deyə DTX-nin məlumatında bildirilir.

Toplanılan materiallara əsasən, Ağstafa Rayon İcra Hakimiyyətinin başçısı Nizaməddin Quliyevin müntəzəm olaraq vəzifə səlahiyyətlərindən sui-istifadə etməsinə dair əsaslı şübhələr yaranıb. Belə ki, Nizaməddin Quliyevin rayon icra hakimiyyəti başçısının müavini Ramiz Tatarovun vasitəsilə 2019-cu ilin may ayından etibarən yerli icra hakimiyyəti və digər yerli dövlət orqanlarının vəzifəli şəxslərindən müxtəlif adlar altında pul vəsaitləri tələb edərək almasına dair əsaslı şübhələr müəyyən edilib.

Nizaməddin Quliyevin, müavini Ramiz Tatarov vasitəsilə fərdi sahibkarlıq fəaliyyəti ilə məşğul olan şəxslərdən müxtəlif əsaslarla rüşvət tələb edərək almasına dair əsaslı şübhələr müəyyən edilib. Bununla yanaşı, Nizaməddin Quliyevin səhiyyə, təhsil və digər yerli dövlət təsisatları rəhbərlərindən büdcə vəsaitləri hesabına yerli dövlət orqanlarının saxlanılması xərclərinə ayrılan vəsaitlərin müəyyən hissəsinin nağdlaşdırılaraq ona təqdim olunmasını tələb etməsi və alması, ictimai işlərə cəlb olunan aztəminatlı şəxslərə ayrılan əmək haqqı kartlarını ələ keçirib mənimsəməsinə əsaslı şübhələr müəyyən edilib. 

DTX həmçinin 2019-cu ilin noyabrına qədər Yevlax şəhər İcra Hakimiyyətinin başçısı vəzifəsində işləmiş Qoca Səmədovun saxlanıldığını bildirib.

O da ictimai işlər üçün ayrılmış 236 min manat (138 min dollar) vəsaitin mənimsənilməsində ittiham edilir.

Bundan başqa, o, 2017-2019-cu illərdə tikinti-təmir işləri üçün ayrı-ayrı şirkətlərə verilən və "nağdlaşdırıldıqdan" sonra məmura qaytarılan 616 min manat (362 min dollar) vəsaitin mənimsənilməsində şübhəli bilinir. Bu zaman heç bir iş həyata keçirilməyib.

Səmədov həmçinin rayonun baş tikinti memarı ilə birlikdə 44 fiziki və hüquqi şəxsdən işlərin həyata keçirilməsinə podrat verilməsi üçün rüşvət almaqda şübhəli bilinir.

Quliyev, Səmədov və digər şəxslər cinayət məsuliyyətinə cəlb ediliblər və vəzifə səlahiyyətlərindən sui-istifadə, dəfələrlə böyük ölçüdə rüşvət alma, mənimsəmə və CM-də nəzərdə tutulmuş digər cinayətlərdə şübhəli şəxs qismində saxlanılıblar. -06D-