ABŞ insan hüquqlarının pozulmasına görə İrana qarşı yeni sanksiyalar tətbiq edir

Vaşinqton/20.12.19/Turan: Cümə axşamı Vaşinqton noyabrda ümummilli etirazların yatırılmasının nəticəsi olaraq insan hüquqları sahəsində yaranmış ciddi böhrana görə İrana qarşı əlavə sanksiyalar elan edib. Hələ də dəqiqləşdirilən rəqəmlər dəhşətə salır: 1000-ə nəfər insan həlak olub, 2000 nəfər yaralanıb, 7000-dən çox insan həbsə atılıb.

"İranda insan hüquqlarının bu şəkildə pozulması yolverilməzdir", deyə dövlət katibi Mayk Pompeo Dövlət Departamentində dinləmələrdə çıxış edərkən bildirib, xəbəri Turan-ın müxbiri verib.

ABŞ hökuməti hüquq müdafiəçiləri və digər İran fəalları barəsində sərt hökmlər çıxarmış İranın iki hakiminin - Məhəmməd Mogisexin və Abolqassem Salavatinin aktivlərini donduracaq, deyə o bildirib.

Donald Tramp administrasiyası həmçinin İran firmalarına və məmurlarına qarşı bir sıra sanksiyalar tətbiq edib. Amerikanın İrana qarşı sanksiyaları digər region ölkələri - Rusiya və Azərbaycan üçün problem yaradır? Turan-ın müxbirinin bu sualına cavabda ABŞ-ın İran üzrə xüsusi nümayəndəsi Brayan Huk bildirib ki, "heç kim üçün istisna olmayacaq".

"Ədliyyə Nazirliyi bu yaxınlarda İran terrorçularına və silah ticarətçilərinə işləyən "Mahan Eyr" aviaşirkəti ilə əməkdaşlıq edən şəxslərin məhkəmə təqibinə məruz qalacağını elan edib. Və "Mahan Eyr" ilə əlaqə saxlayan istənilən şəxs və ya təşkilat sanksiyalara məruz qalacaq", deyə o bildirib.

Vaşinqtonda Xarici Mətbuat Mərkəzində jurnalistlər qarşısında çıxış edən Huk həmçinin qeyd edib ki, ABŞ hökumət əleyhinə nümayişlərin yatırılmasına görə məsuliyyət daşıyan hazırki və ya keçmiş İran məmurlarına viza verilməsini məhdudlaşdıracaq.

Məhdudiyyətlər bu məmurların ailələrinə də şamil olunur.

Demokratiya, İnsan Hüquqları Bürosunda dövlət katibinin köməkçisi Robert Destro öz növbəsində qeyd edib ki, Vaşinqton İranda rejimin dəyişməsini dəstəkləyir, amma bu dəyişiklik ABŞ deyil, İran xalqı tərəfindən həyata keçirilməlidir.

"İran rejimini dəyişdirmək bizim işimiz deyil. Bu, İran xalqının işidir. Biz dəstəkləyə bilərik, amma müdaxilə edə bilmərik", deyə Destro qeyd edib.

Onun sözlərinə görə, hazırda İranlılar çox ciddi problemlərlə qarşılaşırlar: işsizlik səviyyəsi kifayət qədər sarsıdıcıdır; "İran hökuməti öz xalqının yaradıcı potensialını boğduğuna görə" iqtisadiyyat xeyli dərəcədə məhv olur.

Eyni zamanda, İranda dini və milli azlıqlar ayrı-seçkiliklə üzləşir, ABŞ-ın beynəlxalq dini azadlıqlar üzrə səfiri Sem Braunbek belə hesab edir.

Turan-ın İranda Azərbaycanlıların hüquqlarının pozulması haqqında sualına cavabda Braunbek deyib ki, Tehran bütün azlıqların, o cümlədən Azərbaycanlıların hüquqlarını pozur. "Tehran rejiminin müəyyən etdiyi şiəlik ideologiyasına sığmayan bütün hüquqlar pozulur".

"Bu mənada Azərbaycanlılar da hər hansı digər əhali qrupu kimi təqibə məruz qalır", deyə o əlavə edib. -25B-