Ədliyyə Nazirliyi Hüseyn Abdullayevin infarkt keçirməsi barədə xəbərləri təkzib edir

Ədliyyə Nazirliyi Azərbaycan parlamentinin keçmiş deputatı, iş adamı Hüseyn Abdullayevin istintaq təcridxanasında vəziyyətin pisləşməsilə bağlı sosial şəbəkələrdə yayılan xəbərlərə aydınlıq gətirib.

Ədliyyə Nazirliyi Abdullayevin infarkt keçirdiyi və ona lazımi köməklik göstərilmədiyi barədə iddiaları təsdiqləməyib.

Ədliyyə Nazirliyinin məlumatında deyilir ki, Hüseyn Abdullayev  bu il avqustun 2-də ürək nahiyəsində  narahatlıqla bağlı Bakı İstintaq təcridxanasının tibb sanitariya hissəsinə müraciət edib. Həkim-kardioloq tərəfindən müayinə aparılıb, həmçinin ürəyin elektrokardioqrafiyası, daha sonra isə exokardioqrafiyası müayinəsi nəticələrinə əsasən miokard infarkt keçirməsi təsdiqlənməyib.

Hüseyn Abdullayev 1990-cı illərdə neft və neft məhsulları üzrə biznes sahəsində qabaqcıl mövqelər tutub. Onun nəzarətində olan qruplar müxalifətin etirazlarının dağıdılmasında iştirak ediblər.

2005-ci ildə Abdullayev parlamentin deputatı olub və Nazirlər Kabinetinin fəaliyyətini tənqid edib. 2007-ci ilin martında parlamentin iclasında deputat Fəzail Ağamalı Abdullayevi davaya təhrik edib. Amma təkcə Abdullayev cəzalandırılıb. Əvvəlcə həbs edilib,  sonra xuliqanlığa görə 2 il müddətinə şərti azadlıqdan məhrumetmə cəzasına məhkum edilib.

2013-cü ildə  Azərbaycandan mühacirət edib. Bir müddət sonra ona qarşı vergidən yayınma ittihamı ilə cinayət işi açılıb.

2018-ci il aprelin 22-də  Türkiyədə saxlanılıb və Azərbaycana ekstradisiya edilib. Türkiyəyə isə Almaniyadan gedib.

Bakıda Cinayət Məcəlləsinin 192.2.2 (böyük gəlir əldə etməklə qanunsuz sahibkarlıq), 178.2.1 (fırıldaqçılıq), 178.2.2, 178.2.4 (fırıldaqçılıq), 182.2.1 (əvvəlcədən əlbir olmuş şəxslər tərəfindən hədələmə yolu ilə pul tələb etmə), 182.2.2 (eyni əməllər təkrar törədildikdə) və 182.2.4-cü (eyni əməllər, zərərçəkmişə böyük ziyan vurmaqla törədildikdə) maddələrilə ittiham edilib.

2020-ci ilin avqustunda Birləşmiş Millətlər Təşkilatının Özbaşına Həbslər üzrə İşçi Qrupu Hüseyn Abdullayevin dərhal azadlığa buraxılması barədə qərar çıxarıb.

6 illik həbs cəzasının bitməsinə 47 gün qalmış, bu il martın əvvəlində ona qarşı yeni ittiham irəli sürülüb.  O, cinayət yolu ilə əldə edilmiş pulların leqallaşdırılmasında (Cinayət Məcəlləsinin 193-1.3.2-ci maddəsi) ittiham olunur. Hüseyn Abdullayev əsasən 2006-cı ildən 2014-cü ilə qədər 6 milyon manatın yuyulmasında ittiham olunur, baxmayaraq ki, istintaq onun 2000-2018-ci illərdəki hərəkətlərini araşdırıb. İyulun 31-də prokurorluq ibtidai istintaqın başa çatdığını və işin baxılmaq üçün məhkəməyə göndərildiyini bildirib.